شاسوار عه‌بدولواحید ده‌سته‌یه‌كى نوێ بۆ به‌ڕێوه‌بردنى جوڵانه‌وه‌كه‌ى ده‌ستنیشانده‌كات

ناوی ئەو دەستەیە ئاشکرابوو کە شاسوار عەبدولواحید بۆ بەڕێوەبردن‌و سەرکردایەتیکردنی نەوەی نوێ دیاریکردوە.

به‌پێى ئه‌و زانیاریانه‌ى له‌سه‌رچاوه‌یه‌كى نه‌وه‌ى نوێ-وه‌ به‌ئیراده‌ دراوه‌، شاسوار عەبدولواحید سەرۆکی جوڵانەوەی نەوەی نوێ پێش دەستگیرکردن‌و حوکمدانی لەدادگای سلێمانی، حەوت کەسی وەک دەستەیەک دەستنیشانکردوە بۆ بەڕێوەبردن‌و سەرکردایەتیکردنی جوڵانەوەکەو کاروبارەکانی هەڵبژاردن لەغیابی خۆیدا.

سه‌رچاوه‌كه‌ ئه‌وه‌شى ڕونكرده‌وه‌، هەر لەگەڵ دەستگیرکردنیشیدا دەستەکە دەستبەکاربوەو لەماوەی ڕابردوو و لەداهاتوشدا تا ئازادکردنی سەرۆکەکەیان، دەستەکە جوڵانەوەکە بەڕێوەدەبات.

به‌وته‌ى سه‌رچاوه‌كه‌ى نه‌وه‌ى نوێ، "دەستەکە پێکدێت لەهەریەکە لەهەردوو سەرۆکی فراکسیۆنەکانی نەوەی نوێ لەعێراق‌و کوردستان (سروە عەبدولواحیدو کوردەوان جەمال) هەروەها هەریەکە لە(ڕێبوار ئەوڕەحمان، کاوە عەبدولقادر، ئومێد محەمەد، سیپان ئامێدی‌و فاروق غەفور)".

جه‌ختیشیكرده‌وه‌، "شاسوار عەبدولواحید پێش دەستگیرکردنی، تەواوی دەسەڵاتەکانی خۆی وەک سەرۆکی جوڵانەوەکە بەخشیوە بەو دەستەیە، تا لەغیابی خۆیدا بتوانن بڕیاربدەن‌و کاروبارەکان بەو شێوەیە بەڕێوەببەن کە خۆی نەخشەی بۆ داناوە".

ئه‌وه‌شى وت، "ئەوەی تائێستا دیارە ئەوەیە، نەوەی نوێ لەدوای دەستگیرکردنی سەرۆکەکەیەوە بەهەمانشێوەی پێشوی بەردەوامە لەسەر کارەکانی خۆیی‌و لەڕوی گوتاری میدیایی‌و هەڵوێستی سیاسییەوە لەسەر هەمان ڕێچكه‌ى خۆیەتی کە شاسوار عەبدولواحید سەرۆکایەتی دەکردو پلانی بۆ داناوە".

نەوەی نوێ وەک گەورەترین لایەنی ئۆپۆزسیۆن لەکوردستان، خاوەنی 15 کورسی پەرلەمانی کوردستان‌و نۆ کورسی پەرلەمانی عێراقەو لەئێستاشدا لەئامادەکاریدان بۆ هەڵبژاردنی پەرلەمانی عێراق.