لیژنه‌یه‌كى په‌رله‌مانى توركیا ده‌چێته‌ ئیمراڵى‌و له‌گه‌ڵ ئۆجه‌لان كۆده‌بێته‌وه‌

به‌پێى ئه‌و زانیاریانه‌ى میدیاى توركیا ئاشكرایكردوه‌، لیژنەكەی پەرلەمانی توركیا پێنج ئەندام هەڵدەبژێرێت بۆ كۆبونەوە لەگەڵ ئۆجەلان، ده‌شڵێت، "ئه‌و لیژنه‌یه‌ پرۆسەی ئاشتیی‌و هەڵوەشاندنەوەی پەکەکەو داماڵینی چەک‌و دۆخی هەسەدەی لەگەڵ تاووتوێده‌كه‌ن".

پێنج پەرلەمانتاری توركیا كە لەلیژنەی هاوپشتی نیشتمانی‌و برایەتی‌و دیموکراسی هەڵبژێردراون، ڕەوانەی ئیمراڵی دەکرێن بۆ ئەوەی لەگەڵ عەبدوڵڵا ئۆجەلان کۆببنەوەو ئامادەکارییەکان لەئێستاوە دەستیپێکردوە".

ئه‌وه‌ش ڕونكراوه‌ته‌وه‌، "لەکۆبونەوەکەدا تیشکدەخرێتەسەر پرۆسەی ئاشتی‌و هەڵوەشاندنەوەی پارتی کرێکارانی کوردستان (پەکەکە)و ڕێوشوێنەکانی داماڵینی چەک‌و چارەنوس‌و دۆخی هێزەکانی سوریای دیموکرات".

ڕۆژنامەی "سۆزجو" ده‌ڵێت:"شاندێکی پێنج کەسی لەلیژنەکە گەشت بۆ دورگەی ئیمراڵی دەکەن".

لەچەند ڕۆژی ڕابردوشدا، فەتی یڵدز جێگری سەرۆکی مەهەپە، داوای لەنومان کورتوڵموش سەرۆکی پەرلەمانی تورکیا کرد سێ چوار ئەندام لەلیژنەی هاوپشتی نیشتمانی، برایەتی‌و دیموکراسی، لەکاتێکی گونجاودا ڕەوانەی ئیمراڵی بكات بۆ وەرگرتنی لێدوانی عەبدوڵڵا ئۆجەلان‌و جه‌ختیكرده‌وه‌، "ئەم هەنگاوە هیچ لاوازییەكی تێدانییە".