یەپەژە؛ مەرج بۆ دیمەشق دادەنێت و پەیامێکیان ئاراستە دەکات

ئیرادە میدیا

ڕۆهلات عەفرین، فەرماندەی گشتیی یەکینەکانی پاراستنی ژن (یەپەژە)، ئەمڕۆ ١٩ی ئۆکتۆبەر، چەند پەیامێکی توندی ئاراستەی دیمەشق کرد و جەختی لەسەر سەربەخۆیی یەپەژە و پێویستیی بەشداریی ژنان لە پرۆسەی سیاسیی سووریادا کردەوە.

ڕۆهلات عەفرین، ڕایگەیاند: یەپەژە لەناو هێزەکانی سووریای دیموکراتدا سەربەخۆن و پارێزگاری لەم سەربەخۆییە دەکەن. بە ڕاشکاوی ڕایگەیاند: ئێمە هێزێکی سەربەخۆین و دەستبەرداریی بنەماکانی شۆڕشی ژنان نابین.

فەرماندەی گشتییە یەپەژە، تیشکی خستە سەر پرسی دانوستانەکانی داهاتووی سووریا و بە توندی ئیدانەی هەوڵەکانی پەراوێزخستنی ژنانی کرد وتی: هیچ دانوستانێکی ڕاستەقینە بەبێ بەشداریی ژنان ئەنجام نادرێت، ڕێگە نادەین هیچ هێزێک هەوڵی سەپاندنی عەقڵییەتێک بدات کە ئامانجی پەراوێزخستنی ژنان بێت.

ڕۆهلات عەفرین، فەرماندەی گشتیی یەپەژە ڕووی قسەکانی کردە دیمەشق و مەرجێکی بۆ جددیبوونی حکومەت لە پرۆسەی دیموکراسیدا دانا: ئەگەر دیمەشق لە بەدیهێنانی دیموکراسیدا جددییە، دەبێت سەرەتا بە مافەکانی ژنان دەست پێ بکات.

ئەم لێدوانانەی ڕۆهلات عەفرین وەک جەختکردنەوەیە لە گرنگی ڕۆڵی سەرەکیی یەپەژە و پرسی ژنان و یەکسانی ڕەگەزی لە هەر چارەسەر و گۆڕانکارییەکی داهاتووی سیاسی لە ناوچەکەدا.