پاکستان و ئەفغانستان لەسەر ئاگربەستی دەستبەجێ، رێککەوتن

ئیرادە میدیا

هەفتەیەک لە پێکدادانەکانی سەر سنووری نێوانیان، پاکستان و ئەفغانستان لە دەوحەی پایتەختی قەتەر لەسەر ئاگربەستی دەستبەجێ رێککەوتن.

وەزارەتی دەرەوەی قەتەر بەرەبەیانی رۆژی یەکشەممە رایگەیاند: دوای گفتوگۆکان بۆ ئاشتی، هەردوولا لەسەر ئاگربەستی دەستبەجێ و دامەزراندنی میکانیزم بۆ چەسپاندنی ئاشتی و سەقامگیریی بەردەوام لەنێوان هەردوو وڵاتدا رێککەوتوون. ئەم رێککەوتنە دوای هەڵوەشاندنەوەی ئاگربەستێکی 48 کاتژمێری دێت، کە بەهۆی هێرشە ئاسمانییەکانی پاکستان لە رۆژی هەینی دەستیپێکردەوە، کە بەهۆیەوە لانیکەم 10 هاوڵاتیی ئەفغانستان کوژران.

خەواجە ئاسیف، وەزیری بەرگریی پاکستان، رێککەوتنەکەی پشتڕاستکردەوە و جەختی لەوە کردەوە: ئەو هێرشەی لە ئەفغانستانەوە دەکرێتە سەر پاکستان، دەستبەجێ رادەگیرێت و هەردوولا رێز لە سەروەریی یەکتری دەگرن.

زەبیحوڵڵا موجاهید، گوتەبێژی حکومەتی ئەفغانستان، واژۆکردنی رێککەوتننامەکەی پشتڕاستکردەوە و رایگەیاند: بڕیاردرا هیچ کارێکی دوژمنکارانە دژی یەکتری نەکەن و پشتیوانی لەو گرووپانە نەکەن کە هێرش دەکەنە سەر حکومەتی پاکستان.

وەزیرانی بەرگریی هەردوو وڵات وێنەیەکیان لەکاتی تەوقەکردن لە تۆڕی کۆمەڵایەتیی ئێکس بڵاوکردەوە و ئاسیف ئاشکرای کرد: هەردوولا لە 25ی تشرینی یەکەم جارێکی دیکە لە ئیستەنبوڵ کۆدەبنەوە بۆ دڵنیابوونەوە لە جێبەجێکردنی ئاگربەستەکە.

جەنگی سنووری نێوان ئەفغانستان و پاکستان لەو کاتەوە دەستیپێکردووە، کە پاکستان گروپە چەکدارەکان، لەنێویاندا بزاوتی تاڵیبانی پاکستان (TTP)، تۆمەتباردەکات کە لە ئەفغانستانەوە هێرش دەکەن.