هاوسەرۆکانی دەم پارتی سەردانی سەڵاحەدین دەمیرتاشیان کرد

ئیرادە میدیا

ئەمڕۆ، تولای حاتەم ئۆغوللاری و تونجەر باقرخان، هەردوو هاوسەرۆکی پارتی یەکسانی و دیموکراسی گەلان (دەم پارتی)، سەردانی سەڵاحەدین دەمیرتاش، هاوسەرۆکی پێشووی پارتی دیموکراتیکی گەلان (هەدەپە)یان کرد.

دەمیرتاش، کە لە ساڵی ٢٠١٦ـەوە لە چوارچێوەی دۆسیەی سیاسی جیاوازدا، لەوانەش دۆسیەی کۆبانێ، لە زیندانی ئەدرنە ڕاگیراوە، دیداری لەگەڵ هاوسەرۆکانی دەم پارتیدا ئەنجامدا.

ئامانجی سەرەکی لەم سەردانە، تاوتوێکردنی "پرۆسەی ئاشتی و کۆمەڵگەی دیموکراتیک" بووە لە تورکیا. ئەم کۆبوونەوەیە لە کاتێکدایە کە هەوڵەکان بۆ دەستپێکردنەوەی گفتوگۆ و چارەسەری پرسی کورد لە تورکیا بەرەوپیش چووە.

پێشتر هاوسەرۆکانی دەم پارتی سەردانی چەندین سیاسی زیندانیکراوی دیکەی وەک فیگەن یوکسەکداغ، هاوسەرۆکی پێشووی هەدەپە و ژمارەیەک پەرلەمانتار و سەرۆک شارەوانیی پێشوویان کردبوو. ئەم سەردانەش وەک بەشێک لە ستراتیژی دەم پارتی بۆ خستنەڕووی ڕۆڵی زیندانیانی سیاسی لە پرۆسەی ئاشتی و کۆمەڵگەی دیموکراتیکدا دەبینرێت.

چاوەڕوان دەکرێت دوای کۆبوونەوەکە، هاوسەرۆکانی دەم پارتی لێدوانێکی ڕۆژنامەوانی بدەن و وردەکاریی زیاتر لەبارەی ناوەڕۆکی گفتوگۆکانیان ئاشکرا بکەن.