هەسەدە و دیمەشق کۆبوونەوە

ئیرادە میدیا

هێزەکانی سوریای دیموکرات - هەسەدە، ڕایگەیاند: پێشوازییان لە شاندێکی حکومەتی کاتی سوریا لە شاری تەبقە کردووە و لە میانی کۆبوونەوەکەدا بۆ نیشاندانی نیازپاکی، ژمارەیەک دەستگیرکراوی هێزەکانی حکومەتی دیمەشقیان ڕادەست کردووەتەوە.

بەگوێرەی بەیاننامەیەکی هەسەدە، لیژنەیەکی سەربازیی هێزەکانیان لە شاری تەبقەی ژێر کۆنترۆڵی خۆیان پێشوازییان لە شاندێکی حکومەتی سوریا کردووە، کە بۆ تاوتوێکردنی ئەو گرژییانەی لە دەوروبەری گەڕەکەکانی شێخ مەقسود و ئەشرەفیە لە حەلەب ڕوودەدەن و دۆزینەوەی ڕێگەچارەی ئاشتیانە، کە گەرەنتی ئاسایش و سەقامگیری دانیشتووان بکات و ڕێگری لە هەر جۆرە پەرەسەندنێکی مەیدانی بکات.

هەسەدە دەشڵیت: وەک نیشاندانی نیازپاکی، ژمارەیەک دەستگیرکراوی هێزەکانی حکومەتی دیمەشقیان ڕادەستکردووە، کە لەم ماوەیەی دواییدا لە شوێنی جیاواز دەستگیرکراون.

بەگوێرەی میدیا ناوخۆییەکان، شاندەکەی حکومەتی کاتی سوریا سەر بە وەزارەتی ناوخۆ بوون و پێکهاتبوون لە (محەمەد عەبدولغەنی)، فەرماندەی ئاسایشی ناوخۆی حەلەب و (سەراقە عاموری)، بەرپرسی ئاسایشی گشتی ناوچەی عەفرین.