هەڵچنینی دیواری شەرمی نێوان باشوور و ڕۆژئاوا، لەنێوان لێدوانە دژبەرەکانی بارزانیدا

ئیرادە میدیا

لە کاتێکدا جیهان باس لە پشتیوانی و هاوکاری بۆ ڕۆژئاوای کوردستان دەکات، هەواڵەکان ئاماژە بە پڕۆژەیەکی مەترسیدار دەدەن لەسەر سنوورە دەستکردەکانی نێوان باشوور و ڕۆژئاوای کوردستان. میدیای نزیک لە ڕۆژئاوا و چاودێرانی سیاسی ڕایگەیاندووە: پارتی دیموکراتی کوردستان و حکومەتی فیدراڵی عێراق خەریکی دروستکردنی دیوارێکی کۆنکرێتی بەرزن، کە بە "دیواری شەرم" ناسێنراوە، ئەمەش نیگەرانییەکی قووڵی لێکەوتووەتەوە لەسەر داهاتووی پەیوەندییەکانی نێوان هەردوو بەشی کوردستان.

دیواری کۆنکرێتی بە بەرزی ٣ مەتر: لە شنگالەوە تا فیشخابوور
بەپێی گرتە ڤیدیۆییەکان و زانیارییە بڵاوکراوەکان، ئەو دیوارە کۆنکرێتییەی کاری لەسەر دەکرێت، بە بەرزی نزیکەی سێ مەتر و پانی ٧٥ سانتیمەتر دروست دەکرێت.
پڕۆژەکە لە سەرەتادا لەلایەن حکومەتی عێراقەوە لە سنووری نێوان شنگال و ڕۆژئاواوە دەستیپێکردووە و ئێستا لەلایەن پارتییەوە درێژ دەکرێتەوە بۆ ناوچە سنوورییەکانی تر تا دەگاتە هێڵی ڕەبیعە - تەل کۆچەر لە نزیک دەروازەی فیشخابوور بەرامبەر سێمالکا.

لایەنی فەرمی عێراق و پارتی دیموکراتی کوردستان، وتویانە: ئامانجی دروستکردنی ئەم دیوارە پاراستنی خاکی عێراق و هەرێمی کوردستانە لە پەڕینەوەی ڕێکخراوە تیرۆرستییەکان لە سووریاوە، بەتایبەت چەکدارانی داعش.

ڕەخنەگران ئەم بیانووە ڕەت دەکەنەوە و جەخت لەوە دەکەنەوە کە دیوارەکە بە تەواوی لەو سنوورانە دادەنرێت کە هیچ مەترسییەکی ئەوتۆی لێوە نییە بۆ سەر عێراق و هەرێم. ئەوان پێیان وایە کە ئەم پڕۆژەیە لەسەر داخوازی تورکیایە و ئامانجی سەرەکی لێی:

- دابڕینی تەواوەتی کوردانی باشوور و ڕۆژئاوا لە یەکتر.
- خستەنەسەری گەمارۆیەکی سیاسی و ئابووری زیاتر لەسەر ئیدارەی خۆسەری ڕۆژئاوای کوردستان.

ئەم پڕۆژەیە وەک سێگۆشەیەکی مەترسیدار سەیر دەکرێت، کە تێیدا تورکیا لە پشت کارەکەوەیە، لە کاتێکدا حکومەتی عێراق لە ڕووی لۆجستییەوە سەرپەرشتی دەکات و پارتیش بەشی هەرێمی کوردستان تەواو دەکات. ئەم هاوکارییە لە کاتێکدایە، مەسعود بارزانی، سەرۆکی پارتی، لە سەرەتای ئەمساڵ لە پاریس ڕایگەیاند: ئامادەیە هێز ڕەوانەی ڕۆژئاوای کوردستان بکات بۆ پشتیوانیکردنی و خۆشی ئەگەر پێویست بکات دەچێتە هێڵی پێشەوەی بەرگری لە ڕۆژئاوای کوردستان. بەڵام بەپێچەوانەوە، دروستکردنی ئەم دیوارە لەگەڵ داخستنی نوێنەرایەتی ئیدارەی ڕۆژئاوا لە هەولێر بە کردارێکی دژ بە لێدوانەکەی دادەنرێت.

هۆشداری دەدرێت لەوەی، ئەم دیواری شەرمە نەک تەنها دەبێتە هۆی دابڕینی جوگرافی، بەڵکو دەکرێت لە داهاتوودا هەردوو پارچەی کوردستان بخاتە بەردەم مەترسی گەورەتر و ببێتە هۆکارێک بۆ قوڵکردنەوەی ناکۆکییە ناوخۆییەکانی کورد.