دەوڵەت باخچەلی: ئۆجەلان کلیلی پرۆسەکەیە

ئیرادە میدیا

دوای سەردانی لیژنەی پەرلەمانی بۆ لای عەبدوڵڵا ئۆجەلان لە ئیمرالی، دەوڵەت باخچەلی، سەرۆکی پارتی بزوتنەوەی نەتەوەپەرست (مەهەپە)، لە کۆبوونەوەی فراکسیۆنی پارتەکەیدا لە پەرلەمان، لێدوانێکی مێژوویی لەبارەی پرۆسەی چارەسەرییدا.

باخچەلی بەڕوونی ئەم سەردانەی بە "پێشهاتێکی مێژوویی" ناوبرد و بە فەرمی هەڵوێستی پارتەکەی لە پشتیوانیکردنی ئەم هەنگاوە نوێیەدا ڕاگەیاند.

سەرۆکی مەهەپە جەختی کردەوە کە گرنگترین و جیدیترین لایەنی قسەوباس لە ئێستادا "ئیمڕالییە" و بەم قسەیە بەشێوەیەکی ناڕاستەوخۆ دانی بەوەدانا کە ئۆجەلان ڕۆڵێکی یەکلاکەرەوەی لە چارەسەرکردنی کێشەکەدا هەیە.

لە وەڵامی ڕەخنەکانی ئۆپۆزسیۆن و پارتی گەلی کۆماری (جەهەپە) کە دژایەتی پرۆسەکە دەکەن، باخچەلی ڕایگەیاند: تەنها با شەڕ بە یەکجاری لە ژیانماندا نەمێنێت، قەینا با کۆتاییمان سێدارە بێت.

باخچەلی ئۆپۆزسیۆنی بەوە تۆمەتبار کرد کە ئاستەنگ بۆ تورکیای بێ شەڕ دروست دەکەن. هەروەها، ڕەخنەی لەو پارتانە گرت کە لە لیژنەی پەرلەمانی بەشداری سەردانی ئیمرالیان نەکرد، و بە "ترسەنۆکەکان" وەسفی کردن.

لە کۆتایی وتارەکەیدا، سوپاسی پەرلەمانتارانی بەشداربووی کرد و ڕایگەیاند کە ئەم هەنگاوە دەبێتە هۆی وێرانکردنی پیلانی ئیمپریالیستی سەدە و نیوێکە کە لەسەر بەدوژمنکردنی کورد و تورک دامەزراوە.

ئەم وتارەی باخچەلی ئاماژەیەکی بەهێزە بۆ پێکهاتنی ڕێککەوتنێکی سیاسیی گەورە لەسەر پرۆسەی ئاشتی لەناو دەسەڵاتی ئێستای تورکیادا.