شاندی پەرلەمان بە هێلیکۆپتەر بەرەو ئیمراڵی بەڕێکەوت

ئیرادە میدیا

ئەمڕۆ بەیانی شاندێکی باڵای کۆمسیۆنی ئاشتی پەرلەمانی تورکیا، بە مەبەستی کۆبوونەوەیەکی گرنگ لەگەڵ عەبدوڵڵا ئۆجەلان، ڕێبەری زیندانیکراوی کورد، بەره‌و دوورگه‌ی ئیمراڵی به‌ڕێكه‌وت. بەپێی زانیارییەکانی ڕۆژنامەی جمهوریەت، گەشتەکە لە ئیستانبوڵەوە و بە بەکارهێنانی هێلیکۆپتەر ئەنجام دراوە، کە ئەمەش ئاستی هەستیاری و خێرایی کارەکە نیشان دەدات.

شاندەکە پێکهاتەیەکی مێژوویی نوێنەرایەتی هاوپەیمانێتی دەسەڵات و گەورەترین پارتی لایەنگری کورد دەکات، کە پێکهاتوون لە: حوسێن یایمان (ئەکەپە)، فەتحی یەڵدز (مەهەپە)، و گوڵستان کڵچ کۆچگیت (دەم پارتی).

لێرەدا خاڵی سەرنجڕاکێش ئەوەیە، هەموو وردەکارییە لۆجستی و تەکنیکییەکانی ئەم گەشتە و کۆبوونەوەکە، لەلایەن دەزگای هەواڵگریی نەتەوەیی تورکیا (میت) ڕێکخراوە، کە جەخت لەسەر ڕۆڵی میت دەکاتەوە وەک سەرپەرشتیاری سەرەکی دیالۆگە ستراتیجییەکانی دەوڵەت.

پێشبینی دەکرێت ئەم کۆبوونەوە چەند کاتژمێرییە، وەرچەرخانێک بێت بۆ گوێگرتن لە بۆچوونەکانی ئۆجەلان لەسەر چارەسەری کێشەی کورد، هۆکارەکانی سەرهەڵدانی پەکەکە و پێشنیارەکانی بۆ پڕۆسەی یاسادانان. ئاستی نهێنی کۆبوونەوەکە ئەوەندە بەرزە، کە بڕیار دراوە تەواوی ڕاپۆرت و دەنگ و ڕەنگی بۆ ماوەی ١٠ ساڵ بە شاراوەیی بمێنێتەوە.

ئەم سەردانە، کە زۆربەی پارتەکان لە کۆمسیۆنەکەدا دەنگیان پێداوە، وەک سەرەتای گفتوگۆیەکی گشتیتر لەسەر چارەسەری کێشەکە و سەرەتای دیالۆگێکی نوێ لە نێوان دەوڵەت و ئۆجەلان تەماشا دەکرێت.