په‌یامێك له‌وه‌زیرى ده‌ره‌وه‌ى ئه‌مریكاوه‌

ئەمریکا نیگەرانە لەئازاردانی مەسیحییەکان لەهەندێک وڵاتی جیهان‌و وەزیری دەرەوەی ئەو وڵاتەش دەڵێت، ڤیزا نادەین بەوکەسانەی ئازادی ئایینی پێشێلدەکەن.

مارکۆ ڕوبیۆ وەزیری دەرەوەی ئەمریکا لەپۆستێکیدا لەتۆڕی ئێکس نووسیویه‌تى، ئەمریکا لەوەڵامی ئەو تووندوتیژیی‌و دڕندەییەی بەرامبەر مەسیحییەکان لەنایجیریاو سەرتاسەری جیهان ئەنجامدەدرێت، دەستی بەگرتنەبەری ڕێوشوێنی یەکلاکەرەوە کردووە.

ئاماژەی بەوەشکردووە، وەزارەتی دەرەوەی ئەمریکا بڕیاریداوە بەسنووردارکردنی پێدانی ڤیزا بەوکەسانەی دەستیان هەیە لەئاراستەکردن، ڕێگەپێدان، پاڵپشتی دارایی، یان جێبەجێکردنی پێشێلکارییەکانی دژی ئازادی ئایینی.

لەبەشێکی دیکەی پۆستەکەیدا وەزیری دەرەوەی ئەمریکا ئاماژه‌ى به‌وه‌داوه‌، ئەم سیاسەتە نوێیەی ڤیزا بەدیاریکراوی وڵاتی نایجیریاو هەر حکومەت‌و تاکێکی دیکە لەجیهاندا دەگرێتەوە کە خەڵک لەسەر بنەمای باوەڕە ئایینییەکانیان دەچەوسێننەوەو ئازار دەدەن.