وه‌زاره‌تى پێشمه‌رگه‌ زانیارییه‌كى گرنگ ئاشكراده‌كات

هەفتەی داهاتوو هاوکاریی دارایی هاوپەیمانان بەسەر هێزه‌كانى پێشمەرگەدا دابەشدەکرێت، بڕەکەی لە 76 هەزار دینارەوە زیادکراوە بۆ 95 هەزار دینار بۆ هەر پێشمەرگەیەک، پارەکەش زۆربەیان لەڕێگەی هەژماری من-ه‌وه‌ وەریدەگرن.

ئەمریکاو هاوپەیمانان جگە لەپێدانی هاوکاریی لۆجستی‌و سەربازیی، تاوەکو 1ى 1ى 2026 مانگانە 13 ملیارو 500 ملیۆن دینار وەک هاوکاریی دارایی بۆ لیوا هاوبەشەکانی پێشمەرگە دابیندەکەن.

سەرچاوەیەک لەوەزارەتی پێشمەرگە ڕایگه‌یاندووه‌، "ئەم مانگە زیاتر لە 76 هەزار پێشمەرگە لەهاوکارییەکە سوودمەند دەبن‌و هەر پێشمەرگەیەک بڕی 95 هەزار دیناری پێدەدرێت".

هاوکارییەکە سەرەتا زیاتر لە 400 هەزار دینار بوو بەژمارەیەکی کەمی پێشمەرگەکانی لیوا هاوبەشەکان دەدرا، بەڵام مانگ لەدوای مانگ لەدوای بەرەوپێشچوونی چاکسازییەکانی وەزارەتی پێشمەرگە، ژمارەی ئەو پێشمەرگانەی خرانە ژێر چەتری وەزارەت زیاتربوو، واتا هاوکارییەکە پێشمەرگەی زیاتری دەگرتەوە، مانگی ڕابردوو بڕی هاوکارییەکە بۆ هەر پێشمەرگەیەک 76 هەزار دینار بوو، ئەم مانگەش زیادکراوە بۆ 95 هەزار دینار، پارەکەش زۆربەیان لەڕێگەی هەژماری من وەریدەگرن".