سوودانى سێ ملیار دینار بۆ چه‌مچه‌ماڵ ته‌رخانده‌كات

حکومەتی عێراق بڕی سێ ملیار دینار بۆ نۆژەنکردنەوەی ژێرخانی چەمچەماڵ، تەکیە و شۆڕش کە بەر لافاو کەوتوون تەرخان دەکات، بەرپرسێکی باڵا دەڵێت، باوەڕمان بەو کۆمیسیۆن و لیژنەیە نییە کە پێکهێنراوە، خۆمان لەڕێگەی لیژنەی خۆمانەوە پارەکە خەرجدەکەین.

محەممەد شیاع سوودانی سەرۆک وەزیرانی عێراق لیژنەیەکی پێکهێنابوو بۆ لێکۆڵینەوە لەلافاوەکەی چەمچەماڵ و هەڵسەنگاندن بۆ زەرەرو زیانەکان، بەکردەیی سەردانی ناوچەکەیان کردو ڕاپۆرتێکیان ئامادەکرد.

لەڕۆژانی ڕابردوودا بەدواداچوونێك كراو كه‌ ئایا لیژنەکە بەچیگەیشتووە، چیدەکات بۆ چەمچەماڵ و تەکیەو شۆڕش و پیرەمەگروون، بەڵێندراوه‌ لەحکومەتی عێراق، وتیان بڕی سێ ملیار دینارمان تەرخانکردووە، نووسراوی خەرجکردنی پارەکەشمان کردووەو لەسبەیەوە کاری لەسەردەکرێت و لەڕۆژانی داهاتوودا پارە دەنێردرێت.

بەرپرسێکی باڵای حکومەتی عێراق وتوویه‌تى، "پارەکە بۆ نۆژەنکردنەوەی ژێرخانی ئەو ناوچانەیە بەر لافاو کەوتوون، هەمووی چاکدەکەینەوە، وەکو پردو ڕێگه‌و پڕۆژەکانی حکومەت".

ئاماژەی بەوەشکرد، "ئێمە باوەڕمان بەو کۆمیسیۆن و لیژنەیە نییە کە پێکهێنراوە، خۆمان ناوەندی بەڕێوەبردنی قەیرانەکانمان هەیە سەر بەوەزارەتی ناوخۆیە، ئەوان بەکارەکە هەڵساون، پارەکەش لەڕێگەی ئەوان خەرجدەکرێت".

بەهۆی ئەوەی لەکوردستان هیچ فەرمانگەیەکیان نییە، دەبێت بەهەماهەنگی لەگەڵ وەزارەتی ناوخۆی کوردستان پارەکە خەرجبکرێت‌و پڕۆژەکە جێبەجێبکرێت.