هێزێكى عێراق 18 كه‌س له‌سلێمانى‌و دهۆك ده‌ستگیرده‌كات

ئەمڕۆ فەرماندەیی هێزەکانی پاسەوانی سنووری عێراق دەستگیرکردنی 18 کەسی بیانی ئاسیایی ڕاگەیاند کە هەوڵیاندابوو بەشێوەیەکی نایاسایی لەشارەکانی دهۆک‌و سلێمانی بێنە نێو هەرێمی کوردستانه‌وه‌.

 هاووڵاتییانی بیانی لەسووریاو ئێرانەوە هەوڵدەدەن خاڵە سنوورییەکان ببڕن‌و بێنە ناو هەرێمی کوردستان لەوێشەوە برۆن بۆ خوارووی عێراق، بەڵام بەشێکی زۆریان لەلایەن پاسەوانی سنوور یان کارمەندانی ئاسایشی هەرێمی کوردستان دەستگیردەکرێن.

فەرماندەیی هێزەکانی پاسەوانی سنووری عێراق ڕایگەیاند، لەچوارچێوەی ئەرکەکانی پاسەوانی سنوور بۆ بەرەنگاربوونەوەی کەیسەکانی دزەکردن و قاچاخچێتی، مەفرەزەکانی لیوای سنووری یەکەم و سێیەم و 21ەم، لە ئۆپەراسیۆنی جیاوازدا، توانیان 18 دزەپێکەری بیانی بە ڕەگەزنامەی ئاسیایی دەستگیربکەن.

لەڕاگەیه‌نراوەکەدا هاتووە، ئەوکەسانە هەوڵیاندابوو بەشێوەیەکی نایاسایی سنوورە ئیدارییەکانی پارێزگاکانی دهۆک‌و سلێمانی ببڕن، ئێستا ڕێوشوێنی یاسایی پێویست بەرامبەر دەستگیرکراوان گیراوەتەبەر.