له‌دوورگه‌ى كریتى یۆنان سه‌دان کۆچبەر له‌خنكان ڕزگارکران

پاسەوانی کەناراوەکانی یۆنان، ڕزگارکردنی 539 کۆچبەری ڕاگەیاند کە بەرەبەیانی ئه‌مڕۆ هەینی لەباشووری دوورگەی کریت لەدەریای ناوەڕاستدا گیریانخواردبوو لەسەر بەلەمێکی کەشتیوانی.

وتەبێژی پاسەوانی کەناراوەکان بەئاژانسی فرانس پرێسی وتووه‌، لەڕێگەی بەلەمێکی دەوریەی سەر بەدەزگای پاسەوانی سنوورو کەناراوەکانی ئەوروپا (فرۆنتێکس) لەنزیک دوورگەی گاڤدۆس کە نزیکەی 30 کیلۆمەتر لەکەناراوەکانی کریتەوە دوورە، ڕزگارکراون.

پاسەوانی کەناراوەکان ڕاشیگەیاندووە، کە لەنێو ئەو کۆچبەرانەدا خەڵکی بەنگلادیش، پاکستان، میسر، ئێریتریا، سۆماڵ، سودان‌و فەڵەستینیش هەن.

وتەبێژەکە ئاماژەی بەوەشداوه‌، بڕیاره‌ كۆچبه‌ره‌كان بگوازرێنەوە بۆ شاری ڕێتیمنۆ لەدوورگەی کریت.

بەپێی یاساو رێکارەکانی یەکێتیی ئەوروپا، هەموو ئه‌و كۆچبه‌رانه‌ پشکنینی پزیشکییان بۆ دەکرێت پێشئەوەی داواکاری مافی پەنابەرییان لەبەرچاوبگیرێت.

له‌م وه‌رزه‌دا کۆچبەران هەوڵدەدەن لەلیبیا بگەنە دوورگەی کریتی یۆنان بەمەبەستی چوونە ناو سنووره‌كانی یەکێتی ئەوروپا.