ترامپ 24 باڵیۆز لە پۆستەکانیان دووردەخاتەوە

ناوەندی هەواڵ

دۆناڵد ترەمپ، سەرۆکی پێشووی ئەمریکا، بڕیاری دوورخستنەوەی نزیکەی 24 باڵیۆزی دیاریکراوی وڵاتەکەی کە لەلایەن جۆ بایدنەوە دانرابوون، دەرکردووە و داوای لێکردوون تا مانگی یەکی ساڵی 2026 پۆستەکانیان چۆڵ بکەن.

بەپێی زانیارییەکانی بەرپرسێکی وەزارەتی دەرەوەی ئەمریکا، نزیکەی 24 باڵیۆز ئاگادارکراونەتەوە کە دەبێت تا 15 یان 16ی مانگی یەکی 2026 پۆستەکانیان جێبهێڵن.

باڵیۆزەکان لە سەرانسەری جیهانەوە پەیوەندییان پێوەکراوە و پێیان ڕاگەیەندراوە کە دەبێت دەستبەرداری پۆستەکانیان ببن، بەبێ ئەوەی هۆکارێکی ڕوونیان پێ بگوترێت.

بەپێی سیاسەتی ئەمریکا، هەر سەرۆکێکی نوێی کۆشکی سپی، باڵیۆزەکان دەگۆڕێت، بەڵام ئەمجارە ترەمپ دەیەوێت باڵیۆزە پیشەگەرەکان بگۆڕێت کە ئەزموونێکی زۆریان هەیە و وەک فەرمانبەری بێلایەنی دەوڵەت کار بۆ جێبەجێکردنی سیاسەتی سەرۆک دەکەن.

ئیدارەی ترەمپ پێشتر گومانی خۆی بەرامبەر بە کارمەندانی وەزارەتی دەرەوە نیشانداوە و بەشێک لە بەرپرسانی ئەو ئیدارەیە وەزارەتەکەیان بە "پەناگەی لیبراڵەکان" وەسف کردووە.

وەزارەتی دەرەوەی ئەمریکا باس لەوە دەکات کە گۆڕینی باڵیۆزەکان پرۆسەیەکی ئاساییە و سەرۆک مافی خۆیەتی دڵنیا بێتەوە لەوەی کەسانی دڵسۆز بۆ ئەجێنداکەی لە پۆستەکاندا هەن.

دیموکراتەکان هۆشداری دەدەن کە دوورخستنەوەی دیپلۆماتکارە بە ئەزموونەکان، پێگەی سەرکردایەتی ئەمریکا لە جیهاندا بۆ ڕکابەرانی وەک چین و ڕووسیا چۆڵ دەکات.