تەندروستی ڕاپەڕین؛ 35 هاوڵاتی بەهۆی تەرزەو زریانەکەی ئەمڕۆوە بریندار بوون

  ئێوارەی ئەمڕۆ دەڤەری ڕاپەڕین ڕووبەڕووی شەپۆلێکی بەهێزی تەرزە و باران و ڕەشەبا و  گەردەلوول بووەوە، کە زەرەر و زیانی زۆری هەبوە.

بەپێی ڕاگەیاندراوێکی بەڕێوەبەرایەتی تەندروستی ڕاپەڕین، 35 هاوڵاتی بەهۆی ئەم دۆخە نائاساییەوە بریندار بوون، کە زۆربەیان بەهۆی کەوتن و شکان و ئازار گەیشتن بە جەستەیانەوە بووە.

هاوکات، بەپێی ڕاگەیەندراوی وەزارەتی کارەبای هەرێم، بەهۆی با و زریانی بەهێزەوە 18 فیدەری کارەبا لە ئیدارەی ڕاپەڕین لە کار کەوتوون، ئەوەش بووەتە هۆی پچڕانی کارەبا لە بەشێکی زۆری سنوورەکە.

جگە لەبریندابوونی هاوڵاتیان و زیانی کارەبا، گەردەلوولەکە زیانی زۆری بە ژێرخانی ناوچەکە گەیاندووە، لەوانەش شکانی درەخت و ڕووخانی کەپر و کۆشکی کاسبکاران، هەروەها دوو منارەی گەورەی مزگەوت لە ڕانیە ڕووخاون.

 باران و زریانەکەی ئەمڕۆی سنووری ئیدارەی ڕاپەڕین کاریگەری خراپی لەسەر بەرهەمی دانەوێڵە و باخی جووتیارانیش هەبووە.