خەزعەلی: دەبێت سەرجەم هێزەسیاسییەکان، بە سونە و کوردیشەوە بوونى تورکیا لە عێراق قبوڵ نەکەن

ناوەندی هەواڵ

قەیس خەزعەلى ئەمیندارى گشتی عەسائیبى ئەهلى حەق لەکاتی وتاری نوێژی جەژنی ڕەمەزاندا وتی" تورکیا بە هەزاران کەسى لە عێراقەوە گواستووەتەوە بۆ وڵاتەکەیى و دوو هێزى چەکداریی بە ناوەکانى هێزى پاراستنى نەینەوا و قەڵغانى کەرکوک دروستکردووە.

خەزعەلى دەشڵێت، تورکیا دەیەوێت لە رێگەى ئەو دوو هێزەوە دواى دروستکردنى پشێوى هەمان سیناریۆى سووریا لە عێراق دووبارەبکاتەوە و دواتر بێتە ناو عێراقەوە .

ئەمیندارى گشتی عەسائیبى ئەهلى حەق وتی، "ئەوەى دەیڵێم زانیارییە، زانیاریی باوەڕپێکراوە و شیکردنەوە نییە، ئەو زانیارییە لەلاى سەرجەم هێزە ئەمنیی و هەواڵگرییەکانى عێراقە، یەکەمجارە لە دەزگاکانى راگەیاندن باسیدەکەم، زانیارییەکە ئەوەیە، هەزاران چەکدارى میلیشیا، راهێنانیان پێکراوە، پارەدار دەکرێن و سەد لەسەد لەلایەن تورکیاوە سەرکردایەتى دەکرێن".

باسی لەوەشکرد" بە دەیان کەس لە پارێزگاکانى نەینەوا و کەرکوک هەڵبژێردراون نێردراونەتە تورکیا، راهێنانیان پێکراوە، جیاکراونەتەوە و دیاریکراون و مووچەیان پێدراوە، تائێستا ژمارەیەکیان مووچە لەتورکیا وەردەگرن، ناوە فەرمییەکەیان هێزى پاراستنى نەینەوا و قەڵغانى کەرکوکە".

بەپێی وتەی خەزعەلى "ئەو هێزە بەشێکیان ئێستا خراونەتە ناو حەشدى شەعبى، کە پێویستە لێکۆڵینەوە بکرێت، لەناو لیواى 59دان لە نەینەوا، ژمارەیان کەم نییە،مووچە لەعێراق وەردەگرن."

ئاشکراشیکرد، "هەندێک لەو هێزانە لەنزیک بنکەى سەربازیی زێلکانن لە بەعشیقە، ئەرکەکانیان پاراستنى ئەو هێزەى تورکیایە، کە لە سەربازگەى زێلکانن، ئەمە زانیارى هێزە هەواڵگرییەکانى عێراقە و عێراق ئاگادارە".

قەیس خەزعەلی راشیگەیاند، "قسە لەسەر میلیشیاى شیعە دەکرێت، کامە میلیشیاى شیعە، ئەوانەى عێراقین مووچەیان عێراقییە لە پێناوى عێراق دەجەنگن، لەژیر فەرمانى فەرماندەى هێزەچەکدارەکانن، بەڵام ئەوانى تر دەیانەوێت کۆنترۆڵى ئەو ناوچانە بکەن و هەمان ئەزموونى سووریا لەعێراق دووبارەبکەنەوە، دواتر هێزى تورکیا دێتە ناو کێشەکە و هەوڵى بردنى بەشێک لەخاکى عێراق دەدات، بۆیە داواى چارەسەرى ئەم بابەتە بەخیرایی دەکەین".

خەزعەلی هۆشداری دەدات ودەڵیت، "داوا لەسەرۆکوەزیران و سەرجەم هێزەسیاسییەکان، بە هێزە سوونى و کوردییەکانیشەوە دەکەم، بوونى تورکیا لە بەعشیقە قبوڵ نەکەن، ئەوە پێشیلکردنى سەروەریى خاکى عێراقە، بەردەوامبوونى بنکەى سەربازیی تورکیا لە عێراق دەبێتە هۆکارى دابەشبوونى خاکى عێراق، ئەوەش قبوڵکراو نییە.

خەزعەلی لەبارەی دۆخی رۆژهەڵاتی ناوەڕاستیشەوە ڕایگەیاند، ئیسرائیل دەیەوێت رێڕەوی داود بگەیەنێتە سەر خاکی کورد لە عێراق و سوریا، دواتریش پشتیوانی جیابوونەوەی کورد دەکات لەو دوو وڵاتە.