خولی چوارەمی دانوستانەکانی ئەمریکا و ئێران کۆتایی هات

ناوەندی هەواڵ

خولی چوارەمی دانوستانەکانی ئەمریکا و ئێران کۆتایی هات و هەردوولاش گفتوگۆکان بە دڵخۆشکەر وەسف دەکەن.

وتەبێژی وەزارەتی دەرەوەی ئێران رایگەیاندووە، خولی چوارەمی دانوستانەکان لەگەڵ ئەمریکا سەبارەت بە بەرنامە ئەتۆمییەکە قورس بوو بەڵام بەسود بوو.

ئیسماعیل باقائی، وتەبێژی وەزارەتی دەرەوەی ئێران، لە پلاتفۆرمی ئێکس بڵاویکردەوەتەوە،عوممان هەماهەنگ دەبێت بۆ ئەوەی خولی داهاتوو دانوستانەکان بەردەوام بێت و کات و شوێنی کۆبوونەوەکە دیاری بکات.

میدیاکانی ئەمریکاش لەزاری بەرپرسانی ئەمریکاوە رایانگەیاندووە، خولی چوارەمی دانوستانەکان دڵخۆشکەربوون و ئاماژەیان بەوەشکردووە، ویکتۆف گفتوگۆی راستەوخۆ و ناڕاستەوخۆی لەگەڵ ئێران ئەنجامداوە.

هاوکات، ئاژانسی هەواڵی تەسنیم بڵاویکردەوە، گەڕی داهاتووی دانوستان بەمزووانە دەکرێت.