وەزیری بەرگریی ئەمریکا سەردانی ئیسرائیل دەکات

ناوەندی هەواڵ

پێگەی ئەکسیۆس  بڵاویکردوە، پیت هێگسس، وەزیری بەرگریی ئەمریکا، بەنیازە هەفتەی داهاتوو سەردانی ئیسرائیل بکات، پێش سەردانەکەی دۆناڵد ترەمپ، سەرۆکی ئەمریکا بۆ رۆژهەڵاتی ناوەڕاست.

 ئەکسیۆس لە زاری دوو بەرپرسی ئیسرائیلییەوە کە ناویان نەهاتووە رایگەیاندووە، هێگسس لە رۆژی 12ی ئەم مانگە سەردانی ئیسرائیل دەکات و چاوی بە یسرائیل کاتز، هاوتا ئیسرائیلیەکەی و بنیامین نەتانیاهۆ، سەرۆکوەزیرانی ئیسرائیل دەکەوێت.

 دواتر وەزیری بەرگریی ئەمریکا سەردانی سعودیە دەکات بۆ بەشداریکردن لە سەردانەکەی ترەمپ بۆ رۆژهەڵاتی ناوەڕاست کە بڕیارە 13ی ئەم مانگە بەشداری لوتکەی وڵاتانی کەنداو لە سعودیە بکات و دواتریش سەردانی قەتەر و ئیمارات بکات.

هاوكات سەردانەکەی هێگسس بۆ ئیسرائیل یەکەم سەردانی دەبێت بۆ وڵاتەکە لەدوای وەرگرتنی پۆستەکەی و ئەوەش لەکاتێکدایە کە ئەمریکا و ئیسرائیل ناکۆکن لەبارەی هێرشی سەربازیی بۆ سەر دامەزراوە ئەتۆمییەکانی ئێران.