كۆبوونەوەكەی سودانی كۆتایی هات و بڕیاری ناردنی مووچە نەدرا

ناوەندی هەواڵ

كۆبوونەوەی ئەنجوومەنی وەزیرانی عێراق كۆتایی هات، بەڵام هیچ بڕیارێكی بۆ ناردنی مووچەی مانگی نیسانیی مووچەخۆرانی هەرێم تێدا نەدرا.

ئەمڕۆ یەك شەممە11ی ئایاری2025، ئەنجومەنی وەزیرانی عێراق كۆبوونەوەی ئاسایی هەفتانەی خۆی ئەنجامدا،هەرچەندە کۆبوونەوەکە ڕۆژانی سێ‌ شەممە دەکرێت  بەڵام بەهۆی ڕێكارەكانی لوتكەی كۆمكاری عەرەبیی، كە لە بەغدا ئەنجام دەدرێت کۆبوونەوەکە پێشخرا.

مەکتەبی ڕاگەیاندنی سەرۆک وەزیرانی عێراق، بڕیارەكانی ئەمڕۆی ئەنجومەنی وەزیرانی بڵاوكردەوە، كە تایبەت بووە بە بابەتەکانی "كارەبا و پێدانی گاز بە خۆڕایی بۆ مۆلیدەكان بۆ وەرزی هاوین و پەسەند كردنی چەند ڕێككەوتنێكی نێودەوڵەتی و چەند بوارێكی دیكە" و بڕیاریان تێدا دراوە، بەڵام لە بڕیارەكانی كۆبوونەوەكەدا هیچ ئاماژەیەك لە ناردنی مووچەی فەرمانبەرانی هەرێم نەدراوە، كە ئەمڕۆ ماوەی 45 ڕۆژە مووچەیان وەرنەگرتووە

هەر لە كۆبوونەوەی ئەنجوومەنی وەزیران بڕیار دراوە، ڕۆژانی "پێنج شەممەی ئەم هەفتەیە و یەك شەممەی هەفتەی داهاتوو" بكرێنە پشوو بەهۆی ئامادەكارییەكانی لوتكەی كۆمكاری عەرەبی.