٣ساڵ بەر لە ئێستا ژینا ئەمینی شەهید کرا

ناوەندی هەواڵ

ئەمڕۆ ١٦ ئەیلوولی ٢٠٢٥ سێ ساڵ بەسەر کوشتنی ژینا ئەمینی تێدەپەرێت کە بە هۆیەوە لە سەرانسەری ڕۆژهەڵاتی کوردستان و ئێران شۆڕش بە ناوی " ژن . ژیان . ئازادی " سەریهەڵدا و بە ئێستاشەوە لە چەشن و شێوەی جیاواز درێژەی هەیە .

ژینا ئەمینی، ساڵی ٢٠٠٠ لە شاری سەقزی رۆژهەڵاتی کوردستان لەدایکبوو، بەهۆی داگیرکاری و سڕینەوەی زمانی کوردی، خێزانەکەی ناچاربوون ناوی لە بەڵگەنامەی کەسیدا بە مەهسا ئەمینی تۆمار بکەن “...
لە مانگی ئەیلوولی ٢٠٢٢، ژینا لەگەڵ خێزانەکەی سەردانی خزم و کەسوکارەکەی لە تاران دەکەن، لە کاتژمێر شەشی ئێوارەی ڕۆژی سێشەمەی ١٣ـی ئەیلوولی ٢٠٢٢ ، لە نزیک وێستگەی میترۆی شارەکە بە بیانووی باڵا پۆشی دەستگیر دەکرێت و ئەشکەنجەیەکی توند دەدرێت، کە بە هۆیەوە دەچێتە کۆماوە، دوای سەردانی بنەماڵەکەیان، پزیشکی نەخۆشخانە لە ١٦ ی مانگ ، واتا دوای ٣ ڕۆژ لە دەستگیرکردن و ئەشکەنجەدان و گواستنەوەی بۆ نەخۆشخانە، بەکەس و کارەکەی دەوترێت ژینا هۆشی نەماوە و گیانی لەدەستداوە .

ژینا لە تەمەنی ٢٢ ساڵیدا گیانی سپارد بەڵام بەدوای خۆیدا شۆڕشێکی لەسەرانسەری ئێران بەرپاکرد 

دوای کوشتنی ژینا و گواستنەوەی تەرمەکەی بۆ شاری سەقز، یەکەم تروسکەی شۆڕش بە لابردنی سەرپۆشەکانیان و بە وتنەوەی دروشمی " ژن . ژیان . ئازادی " لە لایەن ئامادەبوان و چالاکوانان و دایکانی ناوچەکە دەستی پێکرد .
وەزارەت ئیتڵاعاتی ئێران لەیەکەم کاردانەوەدا هەموو دەرگاکانی شارەکەی داخست بەڵام ئەوە نەیتوانی ڕێ لە دەرپەڕینی شۆڕشەکە بگرێت بۆ سەرانسەر ڕۆژهەڵاتی کوردستان و ئێران ، ناڕەزایەتییەکان زیادیان کرد و ژمارەیەکی زۆر لە ژنان بە وتنەوەی درووشمی “ژن ژیان ئازادی” ڕژانە سەر شەقامەکان و وێنەی عەلی خامنەییان بەردباران کرد.

  دیمەنەکانی کوشتنی ژینا لە تۆڕە کۆمەڵایەتیەکان، دواتر لە سەرانسەری ئێران و هەرچوار پارچەی کوردستان و پاشانیش لە سەرتاسەری جیهان بڵاوکرانەوە .کە بەهۆیەوە و بۆ ماوەی زیاتر لە ١٠٠ ڕۆژ ، شۆڕش و خۆپیشاندانی بەرفراوان لە تەواوی ڕۆژهەڵاتی کوردستان و ئێران بەرپا بوون، هێزەکانی ڕژێم سەدان کەسیان ڕاپێچی زیندان و بەرپەتی سێدارە کرد .  

لەکاردانەوەی ئەو بارودۆخەدا و تەنها لە تۆڕی کۆمەڵایەتی ئێکس و تویتەری کۆن بە زیاتر لە ٣٠٠ ملیۆن هاشتاگی ژینا ئەمینی ڕیکۆردی تۆڕەکە شکێندرا، دەیان و سەدان چالاکوانی ژن لەبەردەم شاشەکاندا قژی خۆیان بڕی، لە ئاستی هەرێمی و نێودەوڵەتیدا دەیان سیاسی و هونەرمەند و کەسایەتی و وەرزشوان وتوێژی جیاواز کاردانەوەیان نیشاندا و پەیوەندیان لەگەڵ حکومەتی تاران بچڕاند .

لە ماوەی دوای کوشتنی ژینا و سەرهەڵدانی شۆڕشەکەدا و بە پێی ووتەیەکی غولام حسین موحسینی،، سەرۆکی دەسەڵاتی دادوەری ئێران و لەبەردەم ئەنجوومەنی باڵای دادوەری وڵاتەکەیدا دانی بەوەدا نا کە تەنها لەو ساڵەدا جیا لەوەی لە لایەن هێزە ئەمنیەکانەوە سەرکوتی خۆپیشاندان بە تونترین شێوە کراوە " زیاتر لە ٩٠ هەزار " داوای یاسای دژی مامۆستا و چالاکوان و خوێندکار و توێژی جیاواز تۆمار کراوە ، هەر لە ماوەی شۆڕشەکەدا لە سەرانسەری ڕۆژهەڵاتی کوردستان و ئێران ٥٢٤ کەس کوژران و بە دەیان و سەدان کەسی دیکە برریندار و دەستگیرکران  .

لە ئێستادا کە سێ ساڵ بەسەر کوشتنی ژینا و سەرهەڵدانی شۆڕشەکەدا تێدەپەڕێت، لە نێو زیندانەکانی ئەوین و زیندانەکانی دیکەی ڕۆژهەڵاتی کوردستاندا ڕۆحی شۆڕشەکە زیندووە، هەموان پێان وایە کە شۆڕشی ژینا وەک پشکۆی ژێر خۆڵە مێشە و لە هەر ئان و ساتێکدا گۆڕانکاری ڕیشەی لە ڕۆژهەڵاتی کوردستان و ئێراندا دروست دەکات .