سەرۆکی یەکێتی و سەرۆکی جوڵانەوەی نەوەی نوێ لەکۆبوونەوەدان

ناوەندی هەواڵ

سەرۆکی یەکێتی بە سەرۆکایەتی شاندێک سەردانی شاسوار عەبدولواحید، سەرۆکی جوڵانەوەی نەوەی نوێ کرد و بڕیارە گفتوگۆ لەسەر پڕۆژەکەی نەوەی نوێ بکەن بۆ کاراکردنەوەی پەرلەمان و پێکهێنانی حکومەت.

بافل تاڵەبانی دوای کۆبونەوەی لەگەڵ محەمەد حاجی مەحمود سەرۆكی پارتی سۆسیال دیموكرات،  بە مەبەستی  هەنگاونان بۆ پێکهێنانی کابینەی نوێی حکومەت سەردانی شاسوار عەبدولواحیدی کرد و لەگەڵیدا کۆبووەوە.

دوای ئەوەی بافڵ تاڵەبانی وەڵامی پڕۆژەکەی نەوەی نوێی دایەوە، کەمێک پێش ئێستا بافڵ تاڵەبانی، بە سەرۆکایەتی شاندێکی یەکێتی سەردانی نەوەی نوێ کرد و بڕیارە شاسوار عەبدولواحید و بافڵ تاڵەبانی گفتوگۆ لەسەر پڕۆژەکەی نەوەی نوێ بکەن
 
ئەمڕۆ، شەممە، سەرۆكی یەكێتی  چەند کۆبونەوەیەک لەگەڵ لایەنە سیاسییەكان ئەنجامدا و  لە كۆبونەوەكانیدا لەگەڵ لایەنە سیاسییەكان جەخت دەکاتەوە لە كاراكردنەوەی پەرلەمان و پێكهێنانی كابینەی نوێی حكومەتی هەرێم.

شاندی نەوەی نوێ بە سەرۆکایەتی شاسوار عەبدولواحیدە و هەروەها هەریەک لە رێبوار ئەورەحمان و سروە عەبدولواحید و کوردەوان جەمال و هیمداد شاهین بەشدارن.

شاندی یەکێتیش بە سەرۆکایەتی بافڵ تاڵەبانی و ئەندامێتی ئەحمەد حەمەکەریم ئەندامی مەکتەبی سیاسی و شاڵاو کۆسرەت رەسوڵ و سالار سەرحەد ئەندامی سەرکردایەتی ئەو حزبەیە.