بە پێی راپۆرتەكە، ئەو پلانە لە چوارچێوەی پڕۆژەیەكی فراوانتری ئیسرائیلدا بووە بۆ هێنانەدی گۆڕانكاری ریشەیی لە سیستمی دەسەڵاتی ئێران دوای وەشاندنی ئەو گورزە سەرەتاییانەی كە سەركردایەتی باڵای ئێرانیان كردە ئامانج، لەوانەش عەلی خامنەیی رابەری باڵای ئێران و ژمارەیەك لێپرسراوی تری باڵای ئێران.

رۆژنامەكە ئاماژەی بەوەشكردووە، دۆناڵد ترەمپ سەرۆكی ئەمریكا هەر لە سەرەتای جەنگەوە ئاماژەی بە پێویستی بوونی كەسێك كردووە لە ناوخۆ سەركردایەتی ئێران بكات، بەڵام سەیرەكە لەوەدا بوو ئەم كەسە بە وتەی بەرپرسانی ئاگاداری ئەمریكا مەحمود ئەحمەدی نەژاد بووە، كە لە نێوان ساڵانی 2005 بۆ 2013 سەرۆكی ئێران بووە.

بەپێی راپۆرتی نیویۆرك تایمز، ئەحمەدی نەژاد لە یەكەم رۆژی شەڕدا لە هێرشێكی ئاسمانی ئیسرائیل كە ماڵەكەی لە تاران كردە ئامانج، بریندار بووە، كاربەدەستانی ئەمریكا رایانگەیاندووە، ئەو هێرشە بە مەبەستی رزگاركردنی ئەو بووە لە دەستبەسەری لەماڵەكەی خۆیدا كە لەلایەن دەسەڵاتدارانی ئێرانەوە بەسەریدا سەپێنراوە.

رۆژنامەكە روونیشیكردووەتەوە، ئەو هێرشە ماڵی ئەحمەدی نەژادی بەتەواوەتی وێران نەكردووە، بەڵكو بنكەیەكی ئەمنیی لە نزیك شوێنی نیشتەجێبوونەكەی كردووەتە ئامانج كە ئەندامانی سوپای پاسداران تێیدا جێگیر بوون بۆ چاودێریكردنی.

هێرشەكە بووەتە هۆی گیانلەدەستدانی چەند كەسێكیان و ئەحمەدی نەژادیش ڕزگاری بووە، بەڵام دواتر لە چاو ون بووە، كە شوێنی نیشتەجێبوون و تەندروستی بە نادیاری ماوەتەوە.

رۆژنامەكە لە زاری سەرچاوە نزیكەكانی ئەحمەدی نەژادەوە رایگەیاندووە، نەژاد ئاگاداری پلانی ئیسرائیل-ئەمریكا بووە و واشنتۆن بە كەسایەتییەكی زانیوە كە توانای بەڕێوەبردنی دۆخی سیاسی، سەربازی و كۆمەڵایەتی لە ئێران لە قۆناغی راگوزەر هەیە.

بەڵام بەگوێرەی راپۆرتەكە، پلانەكە لەدوای هێرشەكەی سەرەتا هەڵوەشاوەتەوە، چونكە ئەحمەدی نەژاد لە پرۆژەی گۆڕینی سیستمەكە بێ ئومێد بووە، بەتایبەتی دوای ئەوەی بە زحمەتی لە بۆردومانی ئیسرائیل رزگاری بووە.