یه‌كگرتوو داوا له‌ به‌ریتانیا ده‌كات ناوبژیوانى پارتى و یه‌كێتى بكات

ناوەندی هەواڵ

دواى ئه‌وه‌ى سه‌ڵاحه‌دین به‌هادین ئەمینداری گشتی یەكگرتووى ئیسلامى كوردستان و ئاندرو بیزلی كونسوڵی بەریتانیا له‌ هه‌رێمى كوردستان كۆبوونەوە، ئەمینداری گشتی یەكگرتوو داوای لە كونسوڵی بەریتانیا كردووە رۆڵبگێرێت لە چارەسەركردنی كێشەكانی هەرێم.

له‌ دوو ڕۆژى ڕابردوودا سه‌ڵاحه‌دین به‌هادین ئه‌میندارى گشتیی یه‌كگرتووى ئیسلامى كوردستان ده‌ستپێشخه‌رییه‌كى ده‌ستپێكرد تا په‌رله‌مان كارا بكرێته‌وه‌ و كابینه‌ى نوێى حكومه‌تى هه‌رێمى كوردستانیش پێكبهێنرێت، یه‌كه‌مجاریش سه‌ردانى بافڵ تاڵه‌بانى سه‌رۆكى یه‌كێتى نیشتمانى كوردستانى كرد، پاشانیش له‌ هه‌ولێر له‌گه‌ڵ سه‌رۆك و به‌رپرسانى پارتى كۆبوه‌وه‌.

نوسینگەی ئەمینداری گشتی یەكگرتووی ئیسلامی كوردستان ئه‌مڕۆ بڵاویكرده‌وه‌: "پێشنیوەڕی ئەمڕۆ  مامۆستا سەڵاحەدین محەممەد بەهائەدین ئەمینداری گشتی یەكگرتووی ئیسلامی كوردستان پێشوازی لە ( ئاندرو بیزلی) كونسوڵی گشتی بەریتانیا لە هەرێمی كوردستان كرد".

لە کۆبوونەوەکەدا، "دۆخیی گشتی هەرێمی کوردستان و عێراق و ناوچەكە  و پرسی کاراکردنەوەی پەرلەمانی کوردستان و پێكهێنانی حكومەتی هەرێم گفتوگۆی لە بارەیەوە كرا".

وه‌ك نوسینگه‌ى ئه‌میندارى گشتیی یه‌كگرتوو ئاماژه‌ى پێداوه‌" كونسوڵی بەریتانیا لە هەرێم، خۆشحاڵی خۆی بەم دیدارە دەربڕی و دەستخۆشی زۆری هەبوو بۆ ئەو هەنگاو و دەستپێشخەرییەی كەئەمینداری گشتی و یەكگرتووی ئیسلامی ناویانە بۆ چارەسەری ئەم چەقبەستووییە سیاسیەی لە هەرێم هەیە و رۆلی یەكگرتووی ئیسلامی كوردستانی لە پرۆسەی چارەسەركردنی كێشەكان و ئیصلاحی كۆمەڵگەیی بەرزنرخاند".

" لە بەرانبەردا ئەمینداری گشتی یەكگرتوو سوپاسی كونسوڵی بەریتانیای كرد و تەئكیدی كردەوە كە بارودۆخی ناوچەكە و گۆرانكاریە خێراكان لە بەرژەوەندی هەرێمی كوردستان و دەسەڵاتدا نیە و كاراكردنەوەی پەرلەمان و پێكهێنانی حكومەت ئەبێ پەلەی لێ بكرێت ، داوای كرد كە بەریتانیا رۆڵی هەبێت لە خستنە رووی مەترسیەكان بۆلایەنە دەسەڵاتدارەكان و چارەسەركردنی كێشەكان". نوسینگه‌ى ئه‌میندارى گشتیی یه‌كگرتوو واى نوسیوه‌.