یازدەی تەممووز و هێڵی سووری پەکەکە؛ بۆچی پرۆسەی ئاشتی لە تورکیا چەقی بەستووە؟

ڕێک ساڵێک بەسەر هەنگاوی مێژوویی و نیازپاکی گەریلا بۆ سووتاندنی چەک لە ئەشکەوتی جاسەنە تێدەپەڕێت، سستی و کاتکوژیی دەوڵەتی تورکیا وایکردووە باڵی سەربازیی پارتی کرێکارانی کوردستان (پەکەکە) توندترین پەیامی خۆی ئاشکرا بکات، بە جۆرێک موراد قەرەیلان ڕایدەگەیەنێت کە تا عەبدوڵڵا ئۆجەلان بە جەستەیی ئازاد نەبێت، هیچ گەریلایەک چەک دانانێت و قەڵغانی چەکدارییان وەک خۆی دەمێنێتەوە.

له‌ کاتێکدا کایەی سیاسیی تورکیا و باکووری کوردستان لەژێر کاریگەریی گفتوگۆکانی پرۆسەی ئاشتیدایە، باڵی سەربازیی پارتی کرێکارانی کوردستان توندترین و ڕوونکەرەوەترین پەیامی خۆی لەبارەی داهاتووی چەک و مەرجەکانی کۆتایهێنان بە خەباتی چەکداری ئاشکرا کرد.

ئەمڕۆ ڕێک ساڵێکی تەواو بەسەر مەڕاسیمی چەک سووتاندنی سیمبولی گرووپێک گەریلا بە فەرماندەیی بەسێ هۆزات لە ئەشکەوتی جاسەنەدا تێپەڕ بوو، ئەو هەنگاوە مێژووییەی وەک بەرزترین ئاستی نیازپاکی بۆ سەرخستنی بانگەوازی ٢٧ی شوباتی ٢٠٢٥ی ئۆجەلان و پرۆسەی ئاشتی تەماشا دەکرا، لەبری وەڵامی ئەرێنیی ئەنقەرە، تەنها ڕووبەڕووی کاتکوژی، سستی، بەردەوامیی گۆشەگیری و سەپاندنی قەیومەکان بووەوە، ڕێک ئەم بێئەنجامی و کاتکوژییەی دەوڵەتی تورکیاش وایکردووە کە باڵی سەربازیی پەکەکە بێتە دەنگ و پێداچوونەوە بە ستراتیژی خۆیدا بکات.

موراد قەرەیلان، ئەندامی فەرماندەیی گشتیی ناوەندی پاراستنی گەل (نەپەگە)، لە ڕێگەی چاوپێکەوتنێکەوە ڕایگەیاند، عەبدوڵڵا ئۆجەلان دانووستانکاری سەرەکیی ئەوانە و تەنیا بە ئازادیی جەستەیی ئەو بڕیاری چەکدانان دەچێتە بواری جێبەجێکردنەوە، ئەو ئاشکرای کرد کە لە کۆنگرەی دوازدەیەمینی پارتەکەدا دەستپێشخەریی بڕیاردان لەسەر پرسی چەکدانان بە تەواوی دراوەتە دەست گەریلا و ئۆجەلان، هۆشداریشی دا کە هەر جۆرە هێرشێک بۆ سەر هێزەکانیان بە وەڵامدانەوەیەک دەبێت کە سێ بۆ چوار هێندە بەهێزترە لە جاران.

 قەرەیلان بە توندی ئەو دەنگۆیانەی ڕەتکردەوە کە دەڵێن پەکەکە لەبەر لاوازی ڕووی لە پرۆسەی سیاسی کردووە و ڕایگەیاند، سوپای تورکیا دوای چوار ساڵ شەڕی بێوچان لە ناوچەکانی زاپ و مەتینا تووشی بنبەست بوو نەک گەریلا.

فەرماندەکەی نەپەگە تیشکی خستە سەر ئەوەی کە پەکەکە خاوەنی ماتەوزە و تەکنەلۆژیایەکی سەربازیی پێشکەوتووە، کە دەتوانێت گورز لە ئامانجگەلێک بوەشێنێت کە ٨٠٠ کیلۆمەتر دوورن، لەوانەش سەرچاوە ئابووری و نەوتییەکانی تورکیا، ئەو ئاماژەی بە خستنەخوارەوەی دوو درۆنی پێشکەوتووی جۆری ئاکنجی کرد لە بەرزیی ١١ هەزار مەتر لە ئاسمانی قەندیلدا،کە بەهۆیەوە جووڵەی درۆنە بۆمبڕێژکراوەکانی تورکیا وەستاوە، جەختی کردەوە کە ڕاگرتنی شەڕ تەنیا لەبەر بڕوابوونیان بووە بە ستراتیژیی سیاسەتی دیموکراتیی ئۆجەلان نەک بێدەسەڵاتی.

موراد قەرەیلان هۆشداریی ئەوەشی دا کە دەوڵەتی تورکیا دوای ڕاپۆرتە مێژووییەکەی تشرینی یەکەمی ٢٠٢٤ و بانگەوازی دەولەت باخچەلی بۆ مافی هیوا، نەک هەر پرەنسیپی مافی هیوای پشتگوێ خستووە، بەڵکو لە ڕێگەی ڕاگەیاندنەکانەوە خەریکی شەڕێکی دەروونیی قورسە، دەیەوێت بەڵێنی درۆینە بڵاو بکاتەوە بۆ شکاندنی متمانەی گەل و کوژاندنەوەی چالاکیی کۆمەڵگەکەیان، تەنانەت ماوەی ٤٢ ڕۆژە هیچ دیدارێک لەگەڵ ئیمرالیدا ئەنجام نەدراوە.

لە کۆتاییدا، ئەم پەیامە نوێیەی باڵی سەربازیی پەکەکە پیشانی دەدات، کێشەی کورد بە یاسای پەشیمانی و تاکتیکی سەرقاڵکردن چارەسەر نابێت، پرسی چەکدانانی گەریلا هاوکێشەیەکە کە تەنیا یەک دەرئەنجامی هەیە، ئەویش بریتییە لە دانپێدانانی فەرمی بە عەبدوڵڵا ئۆجەلان وەک دانووستانکاری سەرەکی و مسۆگەرکردنی ئازادیی جەستەیی ئەو، و بەبێ ئەم هەنگاوە قەڵغانی چەکداریی گەریلا لە بەرامبەر سستییەکانی ئەنقەرەدا وەک خۆی دەمێنێتەوە.