پەککەوتنی حکومەت و قەیرانی مووچە و بەنزین؛ هاووڵاتیانی هەرێم بێهیوا بوون و بۆ ناوچە دابڕێندراوەکان کۆچ دەکەن

لە کاتێکدا هاووڵاتییانی هەرێمی کوردستان لەژێر بارقورسیی پچڕانی بەردەوامی کارەبا و قەیرانی سەختی نەمانی بەنزیندا دەناڵێنن، پاشەکشەی ئابووری، پەککەوتنی دامەزراوەکان و قووڵبوونەوەی دوو ئیدارەیی وایکردووە دۆخی ژیان هێندە قورس بێت کە بەشێک لە هاووڵاتییان کارتی زانیاریی خۆیان بۆ ناوچەکانی تری عێراق بگوازنەوە و خەونی گەنجانیش تەنها کۆچکردن بێت.

قەیرانی حووکمڕانی؛ لە پێکنەهێنانی حکومەتەوە بۆ پەککەوتنی ئابووری

قەیرانە قوڵەکانی هەرێمی کوردستان لە بنەڕەتدا ڕەگیان لە قەیرانی سیاسی و پەککەوتنی دامەزراوەکاندا هەیە؛ زیاتر لە دوو ساڵە پەرلەمانی کوردستان پەکیکەوتووە و نەتوانراوە حکومەتێکی کارا پێکبهێنرێت، ئەمەش دۆخەکەی خستووەتە ژێر دەسەڵاتی کاربەڕێکەری و دوو ئیدارەییەوە. لە لایەکی ترەوە، کێشەی بەردەوامی نەدانی مووچە بە ملیۆنێک و ٢٥٠ هەزار مووچەخۆر، ناشەفافیی داهاتەکان و گرێدانی مووچە بە ململانێ سیاسییەکانی نێوان هەولێر و بەغداوە، زەمینەسازی بۆ قەیرانێکی گەورەتر کرد. نەبوونی بودجە و بێباکی دەسەڵاتداران وایکردووە کەرتی ئابووری پەکبکەوێت و دۆخی بژێویی خەڵک بەرەو داڕمان بچێت.

قەیرانی خزمەتگوزاری و تەقینەوەی بازاڕی بەنزین

ئاکامی ڕاستەوخۆی ئەم شکستە سیاسی و ئابوورییانە، تەقینەوەی قەیرانە خزمەتگوزارییەکان بوو، لە سەرووی هەموویانەوە قەیرانی توندی نەمانی بەنزین و پچڕانی کارەبا کە لە هەندێک ناوچە ڕۆژانە زیاتر لە ١٢ کاتژمێر دەخایەنێت. دوای بڕیارێکی بێ‌ئامادەکاریی حکومەت بۆ دابەزاندنی نرخی بەنزین، کۆگاکانی بەنزینخانەکان بەتاڵ بوون و دەرگاکانیان داخست، چونکە پاڵاوگە تایبەتەکان قازانجی خۆیان خستە سەرووی پێداویستییەکانی خەڵکەوە. ئەم ڕەوشە بووە هۆی سەرهەڵدانی بازاڕی ڕەش، بەنزینی ساختە کە سەباب بوو بۆ سووتانی چەند ئۆتۆمبێلێک، گەڕانەوەی فرۆشتنی بەنزین لەسەر شۆستەکان، و پەککەوتنی تەواوی گوزەرانی شۆفێر و فەرمانبەران، لە کاتێکدا پارێزگای سلێمانیش ڕەتیکردەوە بڕیارەکە جێبەجێ بکات و قەیرانەکە زیاتر قووڵ بووەوە.

پێچەوانەبوونەوەی هاوکێشەکان و بێهیوایی کۆمەڵگە

ئەوەی ئەم دۆخە خەمناک‌تر دەکات، تێکچوونی ڕێژەی متمانەی خەڵکە بە حوکمڕانیی ناوخۆ؛ بە پێچەوانەی ساڵانی ڕابردوو کە خەڵکی عێراق خۆزگەیان بە هەرێم دەخوازی، ئێستا بەشێک لە هاووڵاتییانی هەرێمی کوردستان کارتی زانیاریی خۆیان دەگوازنەوە بۆ ناوچە دابڕێنراوەکان و عێراق بۆ ئەوەی لە خزمەتگوزاریی هەرزانتر، ئارد و سوتەمەنی باشتر و دەرفەتی دامەزراوەیی سوودمەند بن. هەستی نادادپەروەری و ناشەفافی وایکردووە خەڵک هەست بە کولەمەرگی بکەن لە کاتێکدا بەرپرسان و حزبی دەسەڵاتدار لە ناخۆشیدا دەژین. لە بەرامبەر ئەم کارەساتە ئابووری و کۆمەڵایەتییەشدا، نەک تەنها دەسەڵات، بەڵکو زۆرینەی هێزەکانی ئۆپۆزسیۆنیش بێلایەن و بێدەنگ ماونەتەوە، ئەمەش وایکردووە گەنجان هیچ هیوایەک بە داهاتوو نەبینن و تەنها ئامانجیان مەترسییەکانی ڕێگەی کۆچکردن بۆ ئەوروپا بێت.