نێچیرڤان بارزانی بۆچی سەردانی دیمەشقی کرد؟

نێچیرڤان بارزانی سەرۆکی هەرێمی کوردستان، رۆژی دووشەممە سێی ئابی ٢٠٢٦ بە سەردانێک گەیشتە دیمەشقی پایتەختی سوریا و لەلایەن ئەحمەد شەرع سەرۆکی سوریاوە پێشوازی لێکرا.

لە کۆبوونەوەیدا لەگەڵ سەرۆکی سوریا، سەرۆکی هەرێمی کوردستان تاوتوێی پەیوەندیەکانی هەرێمی کوردستان و سوریا و عێراق کراوە، لەگەڵ چەند پرسێک کە بە وتەی سەرۆکایەتی هەرێمی کوردستان بەلای هەردوولاوە گرنگ بووە، هەروەها هەماهەنگی لە بوارەکانی سیاسی و ئەمنی و ئابوری.

بە وتەی دڵشاد شەهاب وتەبێژی سەرۆکایەتی هەرێمی کوردستان، سەردانەکە بە هەماهەنگی عەلی زەیدی سەرۆکوەزیرانی عێراق بووە، ئامانجیش لێی پشتیوانی ئاسایش و سەقامگیری نێوان هەولێر و بەغداد و دیمەشقە.

لە کۆبوونەوەی نێوان سەرۆکی هەرێمی کوردستان و سەرۆکی سوریا، پرسی سنور، گۆڕانکارییەکانی ناوچەکە، پەنابەرانی سوری لە هەرێمی کوردستان، لەگەڵ پەیوەندییە ئابوریەکان و گفتوگۆی نێوان هێزە کوردییەکان و حکومەتی دیمەشق، بابەتی سەرەکیی بوون.

ئەو سەردانەی سەرۆکی هەرێمی کوردستان بۆ سوریا، لە کاتێکدایە، پێشتر نێچیرڤان بارزانی و ئەحمەد شەرع لەماوەی دوو ساڵی رابردوودا چەند جارێک کۆبوونەتەوە یاخود بە تەلەفۆن قسەیان کردووە، پرسی پەیوەندیەکان و گۆڕانکارییەکانی سوریا و شەڕی داعشیش بابەتی سەرەکیی بوون.

دڵشاد شەهاب وتەبێژی سەرۆکایەتی هەرێمی کوردستان دەڵێت، سەقامگیری سوریا رەنگدانەوەی لەسەر ناوچەکە بە تەواوی دەبێت، دەشڵێت نێچیرڤان بارزانی جەختی لەسەر پاراستنی مافی سەرجەم پێکهاتەکانی سوریا و بەشداری کورد و لە دامەزراوەکانی سوریا کردەوە.

هەر بە وتەی دڵشاد شەهاب وتەبێژی سەرۆکایەتی هەرێمی کوردستان، سەردانەکەی نێچیرڤان بارزانی لەسەر بانگهێشتی سەرۆکی سوریا بووە و بە هەماهەنگی حکومەتی عێراق بووە.

ئەو بەرپرسەی هەرێمی کوردستان باس لەوە دەکات، هەرێمی کوردستان شوێنێکی ئارام بووە بۆ پەنابەرە سورییەکان. تەئکیدیش دەکاتەوە هەرێم گرنگیی بە دۆسیەی سوریا و گۆڕانکارییەکانی دەدات.

بەپێی زانیارییەکان، لە کۆبوونەوەی نێوان نێچیرڤان بارزانی و ئەحمەد شەرع، باس لە پەیوەندیەکانی هەرێمی کوردستان و سوریا و بە‌هێزکردنی کراوە، لەگەڵ گفتوگۆکردن لەبارەی رێککەوتنی ٢٩ ی کانوونی دووەمی ئەمساڵی نێوان مەزڵوم عەبدی فەرماندەی گشتیی هەسەدە و ئەحمەد شەرع سەرۆکی سوریا، لەبارەی تێکەڵکردنی هەسەدە بە سوپای سوریا و تێکەڵکردنی دامەزراوەکانی ئیدارەی خۆبەڕێوەبەری و حکومەتی دیمەشق.