پەیەدە داوای بەپەلە لە دیمەشق و مەزڵوم عەبدی دەکات؛ "گرێ سپی بێخاوەن نییە"

لە دوای هێرشکردنە سەر کاروانی ئاوارە کوردەکان و سووتاندنی ئۆتۆمبێلەکانیان، کۆمەڵێک بژاردەی ئەمنی و سیاسی دەخرێنە ڕوو

لە دوای هێرشکردنە سەر کاروانێکی خێزانە ئاوارە کوردەکان لە شارۆچکەی گرێ سپی و گیانخواردنی زیاتر لە سەد خێزان لەناو باڵەخانەی قەزاکەدا، پارتی یەکێتیی دیموکراتی (پەیەدە) بە توندی هێرشەکانی سەر دانیشتووانە رەسەنەکەی شارەکەی شارکۆنە کرد و بەپەلە داوای لە مەزڵوم عەبدی، راوێژکاری سەرۆکایەتیی سوریا و پارێزگاری ڕەققە و لایەنە پەیوەندیدارەکانی دیمەشق کرد کە دەستبەجێ ڕێوشوێنی پێویست بۆ ڕاگرتنی پێشێلکارییەکان و پاراستنی هاوڵاتییان بگرنەبەر.

هێرشکردنە سەر کاروانی ئاوارەکان و کاردانەوەی پەیەدە

دووشەممەی رابردوو، کاروانێکی خێزانە ئاوارە کوردەکان لە کاتی گەڕانەوەیان بۆ ناوچەکانی خۆیان لە شارۆچکەی گرێ سپی لە رۆژئاوای کوردستان، لەلایەن عەرەبە هاوردەکانی ناوچەکەوە رووبەڕووی هێرش بوونەوە و ژمارەیەک لە ئۆتۆمبێلەکانیان سووتێنران. لیژنەی ئاوارەکانی شارۆچکەکە ئاشکرای کردبوو کە زیاتر لە 100 خێزانی کورد لەناو باڵەخانەی بەڕێوەبەرایەتیی قەزای گرێ سپیدا گیریان خواردووە، پاشان هێزەکانی ئاسایشی ناوخۆ بۆ پاراستنیان ڕەوانەی شوێنی ئاڵۆزییەکان کران و ئێوارەی هەمان ڕۆژ زیاتر لە 100 خێزانی کوردیان لەناو بینای ئیدارەی گرێ سپی دوورخستەوە و بردیانن بۆ شوێنێکی ئارام.

لە بەرامبەر ئەم پێشێلکارییانەدا، پەیەدە لە راگەیەندراوێکدا جەختی لەسەر لێپرسینەوە لە ئەنجامدەرانی توندوتیژییەکان کردەوە و ڕایگەیاند: "گرێ سپی زەوییەکی بێخاوەن نییە؛ نابێت دانیشتووانە رەسەنەکەی رووبەڕووی پێشێلکاریی سەپێندراو ببنەوە، یان لە مافە شەرعییەکانیان لەسەر خاک، موڵک و ماڵ و ناسنامەی خۆیان بێبەش بکرען". پەیەدە داوای پێکهێنانی لیژنەیەکی تایبەتیشی کرد بۆ مسۆگەرکردنی گەڕانەوەیەکی ئارام و پارێزراو بۆ سەرجەم ئاوارەکان.

پێشێلکردنی ڕێککەوتننامەکەی نێوان دیمەشق و هەسەدە

پەیەدە ڕوونیکردەوە کە ئەم هێرشانە پێچەوانەی رێککەوتننامەی مانگی کانوونی دووەمی ڕابردووی نێوان دیمەشق و هەسەدەیە، کە دوای ئۆپەراسیۆنەکانی سوپای سوریا و هەڵوەشانەوەی دەسەڵاتی خۆبەڕێوەبەری ئەنجامدرا؛ ئەو ڕێککەوتنەی کە بەندێکی سەرەکیی تێدا تەرخانکرابوو بۆ دەستەبەرکردنی گەڕانەوەی ئەو ئاوارانەی لە ساڵانی 2018 و 2019 لە عەفرین، سەرێکانی و گرێ سپی بەهۆی هێرشەکانی تورکیاوە ئاوارە ببوون. پرۆسەی گەڕانەوە پێشتریش ئاستەنگی بۆ دروست بووبوو، لەوانە لە مانگی ئابی ئەمساڵدا هێرشکردنە سەر کاروانێکی زیاتر لە 400 خێزان کە لە حەسەکەوە بەرەو سەرێکانی دەگەڕانەوە، بووە هۆی ڕاگرتنی کاتیی گەشتەکان.

هەڵوێستی سیاسی و نیگەرانییەکان

لای خۆیەوە، ئیلهام ئەحمەد، سیاسەتمەداری کورد، سەرکۆنەی هێرش و دەستدرێژی و سووتاندنی موڵک و ماڵی هاوڵاتییانی کوردی لە گرێ سپی کرد و ئامانجی ئەو هێرشانەی بە هەوڵدان بۆ بڵاوکردنەوەی ترس و هەڕەشەکردن لە سەقامگیری و ئاشتی مەدەنی ناوبردووە. ناوبراو ئۆباڵی سەلامەتی هاوڵاتییان و پاراستنی موڵک و ماڵیان خستە ئەستۆی بەڕێوەبەری ناوچەکە و هێزە ئەمنییەکان و جەختی لەسەر ئەوە کردەوە کە مافی گەڕانەوە بۆ ماڵ و حاڵی خۆیان مافێکی بنەڕەتییە و مایەی سازشکردن نییە.