تورکیا مەرجی کشانەوەی هێزەکانی لە سوریا ئاشکراکرد

ناوەندی هەواڵ

وەزیری بەرگری تورکیا، ئەگەری کشانەوەی هێزەکانی لە خاکی سوریا بەستووەتەوە بە پەسەندکردنی دەستورێکی نوێ و دەستەبەرکردنی ئاسایشی سنوورە هاوبەشەکانی نێوان هەردوو وڵات.

یاشار گولەر، وەزیری بەرگری تورکیا لە چاوپێکەوتنێکی ڕۆژنامەوانیدا لەگەڵ ئاژانسی ڕۆیتەرز، لە وەڵامی پرسیارێکدا سەبارەت بە ئەگەری کشانەوەی هێزەکانی تورکیا لە سوریا ڕایگەیاندووە، ئەوان ئامادەن بۆ پێشکەش کردنی هەموو هاوکاریەک بۆ پەسەندکردنی دەستورێکی هەمەلایەنە، و دروستکردنی کەشێکی لەبار و ئاسایکردنەوەی بارودۆخی سەرسنور.

تورکیا بەر لە سەرهەڵدانی شەڕی سوریا لە ساڵی 2011 هەمیشە پەیوەندییەکی خراپی لەگەڵ دیمەشق هەبووە، لایەنگری نەیارانی بەشار ئەسەدی سەرۆکی سوریای دەکرد، بەڵام ئاسایی بوونەوەی پەیوەندییەکانی نێوان هەردوو وڵات لە هاوینی ئەمساڵدا بەرەوپێشچونی بەخۆیەوە بینیوە، چونکە ڕەجەب تەیب ئەردۆغان، سەرۆککۆماری تورکیا ڕایگەیاندووە، هاکان فیدان، وەزیری دەرەوەی تورکیا و هاوکارەکانی کار لەسەر پلانێک دەکەن بۆ ئاساییکردنەوەی پەیوەندییەکانی نێوان ئەنقەرە، دیمەشق و ئەنجامدانی دانوستان لەنێوان سەرکردەکانی هەردو دوو وڵات.

لای خۆیەوە وەزارەتی دەرەوەی سوریا وەڵامی دایەوە و ڕایگەیاندووە، ئاساییکردنەوەی پەیوەندییەکانی نێوان سوریا و تورکیا دەبێت لەسەر بنەمای گەڕانەوە بۆ دۆخی پێش ساڵی 2011 بێت، دواتر ئەسەد خۆی ڕایگەیاند، کە ئامادەیە چاوی بە هاوتا تورکەکەی بکەوێت ئەگەر لەگەڵ بەرژەوەندییە نیشتمانییەکانی سوریادا بگونجێت.

میخائیل بۆگدانۆڤ، جێگری وەزیری دەرەوەی ڕووسیا ئامادەیی ڕووسیای دەربڕیوە بۆ ڕێکخستنی کۆبوونەوەیەک لە نێوان سەرۆک کۆماری تورکیا و سووریا لە مۆسکۆ، بەڵام ئەمە پێویستی بە ئامادەکارییەکی جددی هەیە.