بلومبێرگ: ڕه‌نگه‌ ئاگره‌كه‌ى كالیفۆرنیا به‌هۆى كێبڵى كاره‌باییه‌وه‌ دروست بووبێت

ناوەندی هەواڵ

ئاژانسى بلومبێرگ له‌ زارى كۆمپانیاى "ئه‌دیسۆن ئینته‌رناشناڵ" پێشبینى ده‌كات ئاگره‌كه‌ى دارستانى ویلایه‌تى كالیفۆرنیا به‌هۆى كێبڵى كاره‌باییه‌وه‌ بووبێت.
وه‌ك ئه‌و ئاژانسه‌ ئاماژه‌ى پێكردووه‌، پاشماوه‌ى كێبڵێكى كاره‌بایی دۆزراوه‌ته‌وه‌ كه‌ له‌ ڕێگه‌یه‌وه‌ 220 كیلۆفۆڵت كاره‌با ده‌گوازرێته‌وه‌.
به‌ڵام سه‌رچاوه‌ى ئه‌و كۆمپانیایه‌ى قسه‌ى بۆ بلومبێرگ كردووه‌، دڵنیا نه‌بووه‌ كه‌ ئه‌و كێبڵه‌ پێش ئاگره‌كه‌ سوتاوه‌ یاخود دواى ئاگره‌كه‌.
ئاگره‌كه‌ى ویلایه‌تى كالیفۆرنیا كه‌ زۆربه‌ى شارى لۆس ئانجڵسى گرتووه‌ته‌وه‌، سێشه‌ممه‌ى ڕابردوو ده‌ستیپێكرد، كاتێك بایه‌كى به‌هێز له‌ ناوچه‌ى باسیفیك بالیسادیس ده‌ستیپێكرد و دانیشتوانه‌كه‌ى ناچاركرد به‌خێرایى هه‌ڵبێن، تائێستا به‌پێى گرته‌ى مانگى ده‌ستكرد زیاتر له‌ 15 هه‌زار هێكتار زه‌وى سوتاوه‌ و كه‌نارى مالیبۆى به‌ناوبانگ گۆڕدراوه‌ بۆ ڕه‌نگى ڕه‌ش.
تائێستا به‌هۆى ئاگره‌كه‌وه‌ 16 كه‌س گیانیان له‌ده‌ستداوه‌ و زیاتر له‌ 12 هه‌زار خانوو و باڵه‌خانه‌ سوتاون، زیانه‌كانى ئاگره‌كه‌ش به‌ 150 ملیار دۆلار ده‌خه‌مڵێنرێت.