پارتی کرێکارانی کوردستان: 41 مانگە هیچ هەواڵێکمان لەئۆجەلان نییە

ناوەندی هەواڵ

پارتی کرێکارانی کوردستان ڕایدەگەیەنێت، 41 مانگە هیچ زانیارییەکەیان لەبارەی عەبدوڵا ئۆجەلان ڕێبەری زیندانیکراوی پەکەکە نییە و ڕەوشی تەندروستی و سەلامەتیی نازانن.

کۆمیتەی بەڕێوەبەریی پارتی کرێکارانی کوردستان لە ڕاگەیەندراوێکدا بە بۆنەی تێپەڕبوونی 40 ساڵ بەسەر  دەستپێکردنی شۆڕشی خەبات و چەکداری ڕایگەیاندووە، لەو ماوەیەدا گەلێک ئازار چەشتن و خوێنڕشتن هەبوون، بەڵام بەفیڕۆ نەچوون و دەستکەوتی مەزن بۆ ئازادی کوردستان بەدەستهێندراوە.

دەشڵێت، دەوڵەتی تورکیا بۆ تێکشکاندنی هەڵمەتی 15ی ئاب هەموو هێزی خۆی بەکارهێنا، هێرشی ئۆپەراسیۆنی بە هەموو جۆرە ناوێکەوە ئەنجامدا و بەو هاوکارییانەی وەریگرتووە ماوەی چل ساڵە نەیتوانی گەریلاکانی ئازادی کوردستان تێکبشکێنێت و لاوازیان بکات.

ئاماژە بەوەش دەکات، لە ئێستادا هەرێمی برادۆست و ڕێکانی و زاپ و مەتینا و حەفتانین فرۆشراون بە دەوڵەتی تورکیا.
پارتی کرێکاران دەشڵیت، ئەزموونی جەنگی 30 ساڵ ئازادیان هەیە و هێزیان پلە بە پلە زیاد دەکات.