هاوتاکردنى مووچەى خانەنشینى پێشمەرگە دوادەکەوێت

ناوەندی هەواڵ

جێگری بەڕێوەبەری خانەنشینی پێشمەرگە رایگەیاند، بەهۆى تەواو نەکردنى رێکارەکان نەتواانرا مووچەى خانەنشینى پێشمەرگە بۆ مانگى حەوت هاوتا بکرێت، چاوەڕێش ناکرێت بۆ مووچەی مانگی هەشت بە هاوتاکراوی مووچەیان پێبدرێت.

بڕیاربوو بۆ مووچەى مانگى حەوت بە هاوتاکراوى مووچەى خانەنشینانى هێزەکانى 70ى پێشمەرگە دابەشبکرێت، بەڵام لە هەولێر کێشە بۆ مووچەکانیان دروستکرا و تا ئێستاش بەفەرمى دیارى نەکراوە کە بۆ مووچەى مانگى هەشت مووچەکانیان هاوتا دەرێت یاخودنا.

فەتحوڵا عومەر، جێگری بەڕێوەبەری خانەنشینی پێشمەرگە ئاماژەى بەوەداوە، بۆ مانگی حەوت مووچەی خانەنشینی پێشمەرگە بە هاوتاکراوی دابەشنەکرا، چونکە رێکاریی یاسایی زۆری پێویستە، پێناچێت بۆ مووچەی مانگی هەشتیش بە هاوتاکراوی دابەشبکرێت.

بەوتەى جێگری بەڕێوەبەری خانەنشینی پێشمەرگە ئەگەر مووچەى خانەنشینی هاوتا بکرێت زۆرینەی دەرماڵەی پلە تایبەتەکان نامێنن و ئەوانەی مووچەکانیان لە 500 هەزار کەمترە لە هاوتاکردنی مووچە سوودمەند دەبن و ئەوانەی لە ملیۆنێک کەمتر وەردەگرن 300 هەزار دیناری دیکەیان بۆ زیاد دەکرێت.

ئاشکراشیکرد، ئەگەر لە ئێستاوە دەست بە رێکارەکانی هاوتاکردنی مووچەی خانەنشینانی پێشمەرگە بکرێت، چوار بۆ پێنج مانگی پێویستە تا تەواودەکرێت.