سەرۆک کۆمارى ئێران گەیشتە هەرێمی کوردستان

ناوەندی هەولێر

دواى سەردانەکەى بۆ بەغداد و شارەکانى عێراق، مەسعود پزیشکیان، سەرۆک کۆمارى ئێران بەیانی ئەمڕۆ پێنج شەممە گەیشتە هەرێمی کوردستان.

مەسعود پزیشکیان سەرۆک کۆماری ئێران لە ڕێگەی فڕۆکەخانەی نێودەوڵەتی هەولێرەوە گەیشتە هەرێمی کوردستان و لەلایەن نێچیرڤان بارزانی، سەرۆکی هەرێمی کوردستانەوە پێشوازی لێکرا.

بەگوێرەى کارنامەى سەردانەکەى پزیشکیان، دواى کۆبوونەوەى لەگەڵ بەرپرسانى باڵاى هەرێمی کوردستان و حکومەت، دوانیوەڕۆى ئەمڕۆ سەردانی سلێمانى دەکات و دەچێتە سەر مەزارى جەلال تاڵەبانى، سەرۆک کۆمارى پێشووترى عێراق و دواتر لەگەڵ بەرپرسانی یەکێتی کۆدەبێتەوە.

هەر بەگوێرەى کارنامەکە، پزیشکیان، لە سلێمانى لەگەڵ بەرپرسانى باڵاى حکومى لە سلێمانى و دواتر لەگەڵ بافڵ  تاڵەبانى، سەرۆکى یەکێتیی نیشتمانیى کوردستان کۆدەبێتەوە.

محه‌مه‌د مه‌حمودیان، سەركونسوڵی ئێران لە سلێمانى، لەبارەی سەردانی پزیشكیان بۆ سلێمانی ڕایگەیاند، هەرێمی كوردستان دوو ناوەندی هەیە، هەولێر و سلێمانی، پزیشكییان بە پێویستی زانیوە سەردانی سلێمانیش بكات.