بڕی ئەو پارەیە ئاشکرابوو کە عێراق لەماوەی نۆ مانگدا بۆ هەرێمی کوردستانی ناردووە

ناوەندی هەواڵ

بەگوێرەی ڕاگەیەندراوی وەزارەتی دارایی عێراق، لەنۆ مانگى ڕابردوودا، داهاتى عێراق بەراورد بە خەرجییەکانى زیادیکردووە و زۆرینەى داهاتەکەش لە نەوتەوە سەرچاوەى گرتووە، لەو ماوەیەدا نزیکەى نۆ تریلیۆن دیناریشى بۆ هەرێمى کوردستان ناردووە.

بەگوێرەى خشتەى وەزارەتى دارایى عێراق، لە نۆ مانگى 2024 کۆى گشتى داهاتی عێراق 114 تریلیۆن و 349 ملیار دینار بووە، لەو بڕە 101 تریلیۆن و 944 ملیار دینار داهاتى نەوت و بەرهەمە نەوتییەکان بووە، هەروەها داهاتى نانەوتى 12 تریلیۆن و 405 ملیار دینار بووە.

بەپێی خشتەکە بەشێوەیەکى ڕێژەیى داهاتى نەوت و بەرهەمە نەوتییەکان 89% بووە و داهاتى نانەوتى 11% بووە.

خەرجییەکانى بەکاربردن بڕەکەى 85 تریلیۆن و 313 ملیار دینار بووەو خەرجییەکانى وەبەرهێنان نۆ تریلیۆن و 565 ملیار دینار بووە، کۆى گشتى خەرجییەکانى حکومەتى عێراق لە نۆ مانگى ئەمساڵدا 94 تریلیۆن و 878 ملیار دینار بووە.

بەگوێرەى داتاکانى وەزارەتى دارایى، دوای دەرکردنى خەرجی بەکاربردن و وەبەرهێنان لە داهاتەکان، زیادەى داهات 19 تریلیۆن و 471 ملیار دینار بووە.

وەزارەتى دارایى عێراق لەڕاگەیەندراوەکەیدا دەشڵێت، لە نۆ مانگى 2024دا بڕى هەشت تریلیۆن و 858 ملیار دینارى بۆ هەرێمى کوردستان رەوانە کردووە.