بێ مووچەیی نرخی مریشك دادەبەزێنێت

ناوەندی هەواڵ

بەهۆی ئەوەی تائێستا حكومەتی هەرێم مووچەی مانگی 11 ی 2024 ی دابەش نەكردووە، خواست لەسەر مریشك كەمی كردووە و بەهۆیەوە نرخەكەی دابەزیوە، ئەوەش لەكاتێكدایە ساڵی 2024 تەنها چەند ڕۆژێكی ماوە.
ئەمڕۆ کیلۆیەک مریشکی زیندوو لە بازاڕەكانی هەرێمی كوردستان بە 2750 دینار فرۆشراوە، لەکاتێکدا بەهای کڕینی 2500 دینارە بووە.
نازم عەبدوڵڵا، سەرۆكی كۆمەڵەی كێڵگە پەلەوەرییەکانی سلێمانی و گەرمیان ڕایگەیاند: شەوی ڕابردوو نرخی کیلۆیەک مریشک لە نێوان 2100 بۆ 2200  دینار بووە. بەراورد بە دوو هەفتەی ڕابردوو، نرخەکان 500 دینار دابەزیون.
سەرۆكی كۆمەڵەی كێڵگە پەلەوەرییەكان دەڵێت دواکەوتنی مووچە و کەمیی خواست هۆکاری سەرەکی ئەم دابەزینی نرخەیە.
نازم عەبدوڵا وتیشی: زیادبوونی بەرهەمهێنان بە ڕێژەیەکی بەرچاو لە پێداویستی هەرێم هۆکارێکی دیکەیە، چونکە هەرێم ساڵانە تەنها پێویستی بە 145 هەزار تۆن مریشکە، بەڵام لە ئێستادا بەرهەمهێنان گەیشتووەتە 400 هەزار تۆن.