لەبارەى بەرزبوونەوەى بەهاى دۆلار دڵنیایى بە هاوڵاتییان دەدرێت

ناوەندی هەواڵ

چەند رۆۆژێکە بەهای دۆلاری ئەمریكی بەرامبەر بە دیناری عێراقی بەشێوەیەكی بەرچاو ڕووى لە بەرزبوونەوەکردووە، ئەندامێکى لیژنەى دارایى لە ئەنجوومەنى نوێەرانى عێراق دەڵێت، بەرزبوونەوەی نرخی دۆلار لە بازاڕەکاندا کاتییە.

دوورۆژە بەهاى دۆلار بەرامبەر بە دینارى عێراقى بەرزبونەوەى بەخۆوە بینیوە بەشێوەیەک نرخی 100 دۆلاری ئەمریکی لە بازاڕەکانی عێراقدا 152 هەزار دیناری تێپەڕاندووە ئەوەش نیگەرانى لاى هاوڵاتییان دروستکردووە.

جەمال کۆچەر، ئەندامی لیژنەی دارایی ئەنجومەنی نوێنەرانی عێراق رایگەیاند، لەگەڵ بانکی ناوەندی بە وردی چاودێریی نرخی دۆلار و دراوەکانی دیکە لە بازاڕدا دەکەن، بەرزبوونەوەی ئەمجارەی نرخی دۆلار کاتییە و بەردەوام نابێت و پێویست ناکات هاوڵاتییان خۆیان بە کڕینى دۆلار سەرقاڵ بکەن.

وتیشى، ئەگەر لە ماوەکانی داهاتوودا ئەم بەرزبوونەوەیە بەردەوامی هەبێت، ئەنجومەنی نو‌ێنەران هەڵوێستی دەبێت و پارێزگاری بانکی ناوەندی بانگهێشت دەکات.

ئەمڕۆ پێنجشەممە بەهاى 100 دۆلار بە 152 هەزار دینار لە بازارەکانى هەرێم مامەڵەى پێوەدەکرێت، ئەو نرخەش بەردەوام لە گۆڕاندایە و واتا بەهاى دۆلار ناجێگیرە.