ئەمریکا کۆمەڵێک سزای نوێی بەسەر ئێران و ڕوسیا سەپاند

ناوەندی هەواڵ

لە یەکەم ڕۆژی ساڵی 2025دا، ئەمریکا کۆمەڵێک سزای نوێی بەسەر هەر یەک لە ڕوسیا و ئێران سەپاند و بڕیارە لە چەند ڕۆژی داهاتوشدا کۆمەڵێک سزای نوێی دیکە ڕابگەیەنێت.

 ئاژانسی هەواڵی ڕۆیتەرز لە زاری وەزارەتی خەزێنەی ئەمریکاوە دەڵێت، کۆمەڵێک سزای قورس و نوێیان بەسەر ئەو دامەزراوە ئێرانیانە سەپاندووە کە پەیوەندیان بە سوپای پاسداران هەیە لەگەڵ کۆمەڵێک دامەزاروەی دیکەی حکومەتی ڕوسیا.

بەپێی هەواڵی  ئاژانسی هەواڵی ڕۆیتەرز، سزاکان لەسەر بنەمای بونی بەڵگەی تێوەگلانی ئێران و ڕوسیا لە دزە پێکردن و بڵاوکردنەوەی زانیاری لەسەر هەڵبژاردنەکانی ئەمریکا، پێدانی زانیاری هەڵە لەسەر هەڵبژاردنەکان بۆ ڕای گشتی و بڕیارە لە چەند ڕۆژی داهاتودا سزای دیکە دەربکرێت.

ئاماژە بەوەشکراوە، سزاکانی دژی ئێران لەگەڵ دەستبەکاربونی دۆناڵد ترەمپ زیاتر دەبن.

هاوکات نوێنەری ئێران لە نەتەوە یەکگرتووەکان ڕەتیکردووەتەوە هیچ لێدوانێک لەسەر بڕیاری سزاکانی ئەمریکا بدات، لە کاتێکدا نوێنەری ڕوسیا بە تەواوی ئەو تۆمەتانەی ڕەتکردوتەوە کە باسی لێوەکراوە.