دروزەكان ڕەتیدەكەنەوە چەك رادەستی ئیدارەی نوێی سوریا بكەن

ناوەندی هەواڵ

سەرۆكی هۆزی یەكگرتووی دروزەكان لە پارێزگای سوەیدا و باشوری سوریا ڕەتیدەكاتەوە چەكەكانیان ڕادەستی ئیدارەی نوێی سوریا بكەن و دەڵێت "جارێ زووە باسی ئەوە بكەین".
شێخ حیكمەت هیجری لە چاوپێكەوتنێكی تەلەفزیۆنیدا ڕایگەیاند:"ڕادەستكردنی چەك شتێكی ڕەتكراوەیە، تا ئەوكاتەی دەوڵەت پێكدەهێنرێت و بەپێی دەستور مافەكانمان دەپارێزرێت".
وتیشی:"جارێ زووە باسی ڕادەستكردنی چەك بكەین، پێویستە دەوڵەتێكی مەدەنی بێتەكایەوە".
سەرۆكی هۆزی یەكگرتووی دروزەكان دەڵێت "ترسمان لە دۆخی ئێستا هەیە ئەگەر هەمووان بەشداری تێدا نەكەن، پێویستە دەوڵەت ڕێز لە تایبەتمەندی هەمووان بگرێت".
وتەكانی شێخ حیكمەت لەكاتێكدایە، چەكدارە خۆجێییەكانی سوەیدا كە دروزین، دوێنێ ڕێگرییان لە هێزێكی تەحریر شام گرت بچێتە شارەكەیانەوە، بەوهۆیەوە ئاڵۆزی دروستبوو، داوایان لە هێزەكە كرد بكشێتەوە بۆ دیمەشق، دواتر هێزەكە لەژێر فشاردا گەڕانەوە بۆ دیمەشق.