مامەڵەکردن بە دراوی ئەلیکترۆنی لە هەرێم قەدەغەکرا

ناوەندی هەواڵ

ئاسایشی هه‌ولێر له‌باره‌ی بازاڕی فۆڕێكس و دراوه‌ ئه‌لیكترۆنیه‌كان هۆشداری ده‌داته‌ هاووڵاتیان و ڕایده‌گه‌یه‌نێت، مامه‌ڵه‌كردن به‌دراوی ئه‌لیكترۆنی و كانزایی قه‌ده‌غه‌یه‌.

به‌ڕێوه‌به‌رایه‌تی ئاسایشی ئابوری سه‌ر به‌ به‌ڕێوه‌به‌رایه‌تی ئاسایشی هه‌ولێر، ئاگاداری هاوڵاتیانی هه‌رێم ده‌كات، کە مامه‌ڵه‌كردن به‌هه‌موو جۆره‌كانی دراوی ئه‌لیكترۆنی و كانزایی فۆڕێكس و USDT قه‌ده‌غه‌یه‌.

لەڕاگەیەندراوەکەدا هاتووە،كۆمپانیاكانی فۆڕێكس و دراوی ئه‌لیكترۆنی له‌ هه‌رێمی كوردستان و عێراق رێگه‌پێدراو نین و مۆڵه‌تی فه‌رمیان نیه‌، به‌پێی بڕیار و رێنماییه‌كانی بانكی ناوه‌ندی عێراق و وه‌زاره‌تی دارایی و ئابوری هه‌رێم ڕێگه‌پێدراو نین و هیچ یاسا و ڕێنماییه‌ك نیه‌ بۆ ڕێكخستنی ئه‌م جۆره‌ چالاكیانه‌.

 سه‌باره‌ت به‌و كۆمپانیایانه‌ی له‌ژێر ناوی جیاجیا كاری فۆڕێكس و كردنه‌وه‌ی خولی فێربونی چۆنیه‌تی مامه‌ڵه‌كردن و كڕینی دراوی ئه‌لیكترۆنی و كانزایی ئه‌نجام ده‌ده‌ن، نایاسایین و ڕێگه‌پێدراو نین.

بەگوێرەی ڕاگەیەندراوەکە، دوای چه‌ندین سكاڵای هاوڵاتیان و زه‌ره‌رمه‌ندبونیان له‌رێگه‌ی ئه‌م كۆمپانیا و بڕۆكه‌رانه‌، ئه‌م به‌یاننامه‌یه‌ بڵاوده‌كه‌ینه‌وه‌ و داوا له‌ هاوڵاتیان ده‌كه‌ین، بۆئه‌وه‌ی تووشی زیانی ماددی نه‌بن، دوربكه‌ونه‌وه‌ له‌مجۆره‌ مامه‌ڵانه‌ و پاره‌كانیان به‌فیڕۆنه‌ده‌ن به‌ پڕوپاگه‌نده‌ و ریكلامی كۆمپانیا و بڕۆكه‌ره‌كان هه‌ڵنه‌خه‌ڵه‌تێن و خۆیان لێ به‌دوربگرن.

ئاسایشی هەولێر لەڕاگەیەندراوەلەدا، ئاگاداری گشت كۆمپانیا و بڕۆكه‌ره‌كان ده‌كه‌ینه‌وه‌ له‌رێگه‌ی سۆشیال میدیا ڕیكلام بۆ كاری فۆڕێكس و دراوه‌ كانزاییه‌كان نه‌كه‌ن، به‌پێچه‌وانه‌ ڕوبه‌ڕوی لێپێچینه‌وه‌ی یاسایی ده‌بنه‌وه‌.