میكانیزمی دادگاییكردنی رۆژنامەنووسان دیاریكرا

ناوەندی هەواڵ

سەندیكای رۆژنامەنووسانی كوردستان لە سلێمانی رایگەیاند، میكانیزمی سكاڵا و دادگاییكردنی رۆژنامەنووسان دیاریكرا.

بەپێی راگەیەندراوێکی لقی سلێمانی سەندیكای رۆژنامەنووسانی كوردستان، دادگای تێهەڵچوونەوەی سلێمانی سەبارەت بە جێبەجێکردنی بڕیاری ژمارە 2722 لە رۆژی 13-3-2025 ئاماژەی بەوەکرد، پێویستە ئەو كەیسانەی میدیایین، لەو بابەتانەی بەناوی میدیاوە دەكرێن جیابکرێنەوە.

ئاماژە بەوەشکراوە، لە رۆژی دەرچوونییەوە ئەو بڕیارە لە دادگاكانی سلێمانی كاری پێدەکرێت و لەوبارەیەشەوە، عومەر ئەحمەد، سەرۆکی دادگای تێهەڵچوونەوەی سلێمانی، لەگەڵ کاروان ئەنوەر، سکرتێری لقی سلێمانی سەندیکای رۆژنامەنووسان، باسی لە میكانیزمی بانگهێشتكردنی میدیاكاران کرد بۆ بەردەم دادگا بەپێی بڕگە و ماددەكانی یاسای رۆژنامەوانی.

هەروەها ئەوەشیان خستەڕوو لە بڕیاری ژمارە 2722 لە رۆژی 13-3-2025ی دادگای تێهەڵچوونەوەی سلێمانیدا هاتووە، دادگای لێکۆڵینەوەی سلێمانی/1 تایبەتمەند دەبێت بە بینینی ئەو سکاڵایانەی پەیوەندیدارن بە رۆژنامەنووسان لەناو شاری سلێمانی و، یاسای ژمارە 35ی ساڵی 2007ی یاسای رۆژنامەگەری لە کوردستاندا، بەسەریدا پیادەدەبێت.