پارەى مووچەى مانگى چوار گەیشت، دابەشکردنى مووچە دەستپێدەکات

وەزارەتى دارایى و ئابورى هەرێم رایگەیاند، تەمویلى موچەى مانگى چوار بەبڕى زیاتر لە 959 ملیار خرایە سەر هەژمارى بانکى وەزارەتمان لەلقی هەولێری بانکی ناوەندی عێراق و لە زوترین کاتدا دەست بەدابەشکردنى مووچە دەکرێت.

دواى نزیکەى 50 رۆژ پارەى مووچەى مانگى نیسان لە بەغداوە نێردرا و نەبوونى مووچەش کاریگەرى لەسەر ژیانى هاوڵاتیان دروستکردووە و تا ئێستا دیارنییە ئاخۆ کەى وەزارەتى دارایى ئابورى هەرێم خشتەکە بڵاو دەکاتەوە و دەست بەدابەشکردنى مووچە دەکات.

ئەمڕۆ سێشەممە، وەزارەتى دارایى و ئابورى حکومەتى هەرێم لە راگەیەندراوێکدا بڵاویکردەوە،  تەمویلی مووچەی مانگی نیسان بە بڕی 959 ملیارو 514 ملیۆن دینار وەک شایستەی مووچەی فەرمانبەران و مووچەخۆرانی هەرێمی کوردستان خرایە سەر هەژماری بانکی وەزارەتی دارایی و ئابووری هەرێمی کوردستان لەلقی هەولێری بانکی ناوەندی عێراق.

لە راگەیەندراوەکەى وەزارەتى دارایى هیچ ئاماژەیەک بۆ بڵاوکردنەوەى لیستى مووچە و دابەشکردنى نەدراوە.