حکومەتی هەرێم بە کۆی دەنگ پڕۆژەی رووناکی پەسەند کرد

ناوەندی هەواڵ

لە کۆبوونەوەی ئەمڕۆی ئەنجومەنی وەزیراندا بەکۆی دەنگ پرۆژەی رووناکی واتە کارەبای (24) کاتژمێری پەسەند کرا.

پێشەوا هەورامانی، وتەبێژی حکومەتی هەرێمی کوردستان لەدوای کۆبوونەوەی ئەنجومەنی وەزیران لەبارەى پرۆژەی رووناکییەوە، ڕایگەیاند، "پرۆژەکە بە کاری هەماهەنگی هەریەک لە حکومەت و هاوڵاتیان جێبەجێدەکرێت".

بەگوتەى پێشەوا هەورامانى، تەواوی هاوڵاتیان لە پرۆژەکە سوودمەند دەبن و جگەلەوەی رەچاوی باری دارایی  کراوە و ئێستا 80% خەڵکی دەتوانن کارەبای 24 کاتژمێرییان هەبێت و پارەیەکی کەمتر لە جاران بدەن.

وتیشى "پلانی حکومەت ئەوەیە تاوەکو کۆتایی ئەمساڵ پرۆژەکە بۆ سەنتەری شارەکان دابینکرابێت، دواتر پرۆژەکە دەبرێتە دەرەوەی شارەکان".

ئاماژەى بەوەشکرد، لە سێ مانگی یەکەمدا کارەبا بە نرخى پاڵپشتیکراو بە هاوبەشان دەدرێت.