ویستیان جەژنانە کۆ بکەنەوە بەڵام زیندان بوو بەجێگەیان

ناوەندی هەواڵ

دوو تۆمەتبار بەتۆمەتی وەرگرتنی پارەی جەژنانە لەهاوڵاتیان بەناوی کۆمپانیای پاکەرەوە لەگەڕەکی بەختیاری شاری سلیمانی دەستگیرکران

ئەمڕۆ سێشەممە 3ی 6ی 2025، بەڕێوەبەرایەتی پۆلیسی پارێزگای سلێمانی له‌راگه‌یه‌ندراوێكدا بڵاویكرده‌وه‌، پاش ئاگاداربوونی بەشی پۆلیسی فریاکەوتن بەوەی کە  دوو کەس لەشاری سلێمانی/گەڕەکی بەختیاری هەستاون بەکۆکردنەوەو وەرگرتنی پارەی جەژنانە لەهاوڵاتیان بەناوی کۆمپانیای پاکەرەوەوە، دەستبەجێ مەفرەزەکانیان ئامادەی شوێنی ئەو هەڵسوکەوتە تۆمەتکارییە بوون و توانرا دوو تۆمەتبار دەستگیربکرێت و دەستبگیرێت بەسەر ئەو بڕە پارانەدا کە وەرگیرابوون.

بەپێى راگەیەنراوى پۆلیسى سلێمانى، دوو تۆمەتبارەکە دواى دەستگیرکردنیان هەموو ئەو پارانەشیان لێ وەرگیراوە کە بۆ جەژن کۆیان کردبووەوە.

پۆلیس داواش دەکات هەر کەسێک هات بەناوى کارمەندى پاککەرەوە داواى جەژنانەى کرد لە رێگەى هێڵى گەرمى (100.104.105)، زەنگ لێبدەن و ئاگاداریان بکەنەوە.