وردەکاریی ڕێوڕەسمی چەکدانانی پەکەکە ئاشکرا کرا

ناوەندی هەواڵ

نوسینگەی ڕاگەیاندنی کەجەکە لەبارەی وردەکاریی کات و شوێنی مەڕاسیمی لەناوبردنی چەک لە سلێمانی دەڵێت، ڕێوڕەسمەکە رۆژی هەینی 11ی تەمووز، کاتژمێر 8 بۆ 9ی بەیانی بەڕێوەدەچێت.

ئەمڕۆ چوارشەممە 9ی تەمووزی 2025، نوسینگەی کۆما جڤاکێن کوردستان (کەجەکە) لە ڕاگەیەندراوێکدا بڵاویکردەوە، شوێنی دیاریکراو ئاشکرا ناکرێت، بەڵام ئۆتۆمبێل دابینکراوە و هەموو بەشداربووان دەگەیەنێتە شوێنێکی نزیک لە شوێنی دیاریکراوی مەڕاسیمەکە.

دەشڵێت، بۆ ئەو مەبەستەش لە (هۆتێل ئاشوور) لە دوکان ئامادە بن، بەشداربوون پێویست بە هیچ خۆتۆمارکردنێکی پێشوەختە ناکات، بەڵام پێویستە باجی تایبەتی رۆژنامەوانی و ناسنامەتان پێ بێت و خۆتان بناسێنن.

کەجەکە ڕوونیکردەوە، ئەو شوێنەی رۆژنامەنووسانی بۆ دەبرێت بۆ رووماڵکردن، مەڕاسیمەکە لە شاشەیەکی گەورەوە نیشان دەدرێت، هەروەها دەتوانن بە خواستی خۆتان دیمەن و دەنگی خامی مەڕاسیمەکە بەدەستبهێنن، ئەو شوێنە کارەبای لێ دەبێت، بە هۆکاری ئەمنیی ناتوانن لێدوان لە ئەندامانی گرووپەکە وەربگرن، بەڵام قسەکردن لەگەڵ چاودێرەکان ئاساییە.