شارەزایەکی ئەمنی وردەکاریی کشانەوەی ئەمریکا ئاشکرادەکات

شارەزایەكى ئەمنی كە هاوكات فەرماندەیەكى پێشوی هێزەکانی گردبونەوەى هۆزەكانى عێراقە، ئاشکرایکرد؛ کشانەوەی هێزەکانی ئەمریکا لە بنکەی عەین ئەسەد لە پارێزگای ئەنبار بەردەوامە و بڕیارە تا ناوەڕاستی ئەم مانگە پرۆسەكە بە تەواویى كۆتایى پێبێت.

قەتەرى ئەلسەمەرمەد لە لێدوانێكى تایبەت دا بۆ پێگەى "بەغداد ئەلیەوم" ئاماژەى بەوەداوە كە تەنها هەزار و 600 سەربازى ئەمریكى لە بنکەکەدا ماونەتەوەو پرۆسەی کشانەوەی ڕاستەقینەش دو هەفتە لەمەوبەر دەستیپێکردوە.

ناوبراو لە درێژەى لێدوانەكەى دا ئەوەى خستەڕو كە سەرجەم کاروانە سەربازییەکانی ئەمریکا بەرەو بنکەی "ئەلتەنەف" لە سوریا دەڕۆن، هاوكات ڕەتیشیدەکاتەوە هیچ هێزێک بەرەو هەولێر ڕۆیشتبێت.

ئەلسەمەرمەد، ئەوەشى رونكردەوە كە لە ئێستادا بارەگا و هۆڵەکانی هێزەکانی ئەمریکا ڕادەستی فەرماندەیی ئۆپەراسیۆنەکانی جەزیرە و بادیەى عێراق دەکرێن.

ئەو شارەزا ئەمنییە پێیوایە؛ ئەم کشانەوەیە بەشێکە لە قۆناغی یەکەمی ئەو ڕێککەوتنەی کە لە نێوان بەغدا و واشنتۆن ئەنجامدراوە، کە تێیدا ئەوە دیاریکرا تا مانگی ئەیلولی 2025 کۆتایی بونی هێزەکانی ئەمریکا لە بەغدا و بنکە سەربازییەکان، یەكلابكرێتەوە.

جێى ئاماژەیە، بەگوێرەی ڕێککەوتنەکە قۆناغی دوەمی کشانەوە لە هەرێمی کوردستان لە مانگی ئەیلولی 2025 دەستپێدەکات و کشانەوەی تەواوەتی هێزەكانیش تا مانگی ئەیلولی 2026 تەواو دەبێت، هاوکات ژمارەیەکی سنوردار لە هێزەکان بۆ ماوەی ساڵێکی دیکە لە هەرێم دەمێننەوە.