دادگاى سلێمانى سكاڵاكانى سەر عەجاج وەردەگرێت

دادگای سلێمانی بڕیارى دا دەرگا بە روى ئەو سكاڵایانەدا بكاتەوە كە لەسەر تۆمەتبار"عەجاج ئەحمەد حەردان" ناسراو بە "عەجاجى نوگرە سەلمان" تۆماردەكرێن و بۆ ئەو مەبەستە داوا لەو كەسانە كراوە كە سكاڵایان هەیە بێن لە دادگاكە تۆمارى بكەن.

لە ڕاگەیەندراوێکدا کە دەست ئیرادە كەوتوە، دادگاکە ئاماژەی بەوەکردوە، كە دوای ڕاسپاردنی سەرۆکایەتی دادگای تێهەڵچونەوەی قەزای سلێمانی، دادگای لێکۆڵینەوەی سلێمانی/5، بۆ وەرگرتنی داواکاریی یاسایی لە کەسوکاری ئەنفالکراوان لە دژی تۆمەتبار (عەجاج ئەحمەد حەردان)، ڕێکاری یاسایی دەستیپێکردو لێدوانی سکاڵاکارانیش  تۆمارکراون.

دادگاکە دوپاتیكردۆتەوە؛ پرۆسەکە لە چەند ڕۆژی داهاتودا بەردەوام دەبێت، دوای تەواوبونی ڕێکارە یاساییەکانیش وتە وەرگرتن و داوا یاساییەكانى سکاڵاکاران؛ ڕەوانەی دادگای باڵای تاوانەکانی عێراق دەکرێت.

پێشترو لە راپۆرتێكى وێبسایتى ئیرادەدا لەسەر تۆمەتبارى ناوبراو، زانیارى ئەوە درابو بە خوێنەر كە ژنێك بە ناوى"فەزیڵە حسێن" یەكەمین كەس بوە داواى یاسایى لەسەر "عەجاج ئەحمەد حەردان ئەلعوبێدى" تۆماركردوەو بەهۆى داواكەى ناوبراوەو ئەو تۆمەتبارە مەترسیدارە دەستگیركراوە.

هاوكات، بەهۆى شاهێدى دانى فەزیڵەوە، دەزگاى ئاسایشى نیشتمانى عێراقى لە مانگى ئایارى رابردودا، هەواڵى دەستگیركردنى تۆمەتبار "عەجاج"ى راگەیاند، كە بۆ ماوەى 37 ساڵ توانیبوى لەبەرچاو ونبێت و خۆى بشارێتەوە، سەرەڕاى ئەوەى خێزانەكەى لە ساڵانى رابردودا هەواڵى مردنى ناوبراویان بڵاوكردبۆوە، ئەمەش لەپێناوى ئەوەى دەزگا ئەمنییەكان بەلاڕێدا ببەن و چیتر بەدوایدا نەگەڕێن.