نرخی زێڕ لەعێراق و کوردستان بەرزدەبێتەوە

ئەمڕۆ شەممە نرخی زێڕ لە بازاڕە ناوخۆییەکانی بەغدای پایتەخت و هەولێری پایتەختی هەرێمی کوردستان بەرزبونەوەی بەرچاوی بەخۆیەوە بینی.

بەپێى زانیارییەكانى ئیرادە، بەرەبەیانی ئەمڕۆ نرخی فرۆشتنى زێڕ لە بازاڕەکانی جوملە لە شەقامی "ئەلنەهر" لە بەغدا؛ بەجۆرێك بەرزبۆتەوە كە هەر مسقاڵێكى عەیارە 21ى خەلیجى و توركى و ئەوروپى؛ بەرانبەر بە   بڕى 730 هەزار دینارى عێراقى مامەڵەى پێوەدەكرێت.

ئیرادە زانیویشیەتى، پاش ئەوەى رۆژى پێنچ شەممەى رابردو نرخى كڕین 719 هەزار دینارى عێراقى بو، بەڵام بۆ ئەمڕۆ شەممە نرخى كڕین گەیشتۆتە 726 هەزار دینارى عێراقى.

لەلایەكى ترەوە، نرخی فرۆشتنی زێڕی عێراقی عەیار 21 گەیشتۆتە 700 هەزار دینارو نرخی کڕینیش بە 696 هەزار دینارە، بەڵام لە دوكانى زەڕەنگەرەكان جیاواز لە بۆرسەو بازاڕى جیهانى نرخەكە گەیشتۆتە 730 هەزار دینار بۆ 740 هەزاردینار، بۆ هەر مسقاڵێك.

هاوكات، لە هەولێریش نرخی زێڕ بەجۆرێك بەرزبۆتەوە، كە نرخی فرۆشتنی مسقاڵێك زێڕی عەیار 22 گەیشتۆتە نزیکەی 751 هەزار دینارى عێراقى و زێڕی عەیار 21یش گەیشتۆتە نزیکەی 717 هەزار دینار، ئەمەش لە كاتێكدایە كە مسقاڵێك لە زێڕی عەیارە 18 گەیشتۆتە نزیکەی 615 هەزار دینارى عێراقى.