شەش پارتی کوردی، بەشداریی هەڵبژاردنە چاوەڕوانکراوەکەی پەرلەمانی عێراق ناکەن

شەش لایەنی سیاسیی کوردستانی لە پارێزگای کەرکووک بڕیاریاندا بەشداری لە هەڵبژاردنی داهاتووی پەرلەمانی عێراقدا نەکەن، ئەوەش وەک هەنگاوێک بۆ ڕێگریکردن لە پەرتەوازەبوونی دەنگی کورد لەو پارێزگایە.

بەپێی زانیارییەکان، هەریەک لە کۆمەڵی دادگەری، حزبی شیوعی، ڕەوتی هەڵوێست، بزووتنەوەی ئیسلامی، حیزبی زەحمەتکێشان، و بزووتنەوەی گۆڕان، هیچ لیست و کاندیدێکیان بۆ هەڵبژاردنی پەرلەمانی عێراق لە پارێزگای کەرکووک نابێت.

هۆکاری سەرەکیی ئەو بڕیارە دەگەڕێتەوە بۆ یاسای نوێی هەڵبژاردن کە پشت بە شێوازی سانت لیگۆی ١.٧ دەبەستێت. ئەو شێوازە چانسی بردنەوەی کورسی بۆ لیستە بچووکەکان زۆر کەم دەکاتەوە و دەبێتە هۆی ئەوەی دەنگەکانیان بە فیڕۆ بچێت.
 ئەو شەش لایەنە سیاسییە، بە لەبەرچاوگرتنی ئەنجامەکانی هەڵبژاردنی پێشوو، گەیشتوونەتە ئەو بڕوایەی کە بەشدارینەکردنیان خزمەتێکی گەورەتر بە پاراستنی ژمارەی کورسییەکانی کورد لە پارێزگای کەرکووک دەکات.

لەبەرامبەر هەڵوێستی ئەو شەش لایەنە کوردییەدا هەریەک لە پارتی و یەکێتی، بەرەی گەل و نەوەی نوێ و سۆسیالیست، بەجیا بەشداری هەڵبژاردنەکە دەبن و یەکگرتووی ئیسلامیش بە کاندیدێک لەگەڵ نەوەی نوێ بەشدار دەبێت .

چاودێران : دۆخی کەرکوک بۆ کورد مەترسیدارە لە نێو ئەو گۆڕانکارییە ناوچاییانە و ناکرێت لە پێناو پۆست و کورسییەکی پارێزگاکە لە پەرلەمانی عێراق ئایندەی کەرکوک بخرێتە مەترسییەوە، بەو پێیەی سیستمی هەڵبژاردنی داهاتووی عێراق لەگەڵ لایەن و قەوارەی بەهێزە و دابەشبوونی دەنگی کوردیش بۆ پێنج یان شەش حزب و گروپ و لایەن، جگە لە زیان سودێکی بۆ کورد نابێت لەو پارێزگایە، بە پێچەوانەوە بۆ عەرەب و تورکمان باشترین خەڵاتە .