سودانى‌و پوتن كۆده‌بنه‌وه‌

سکرتێری ئەنجومەنی ئاسایشی ڕوسیا لەعێراق ڕایگەیاند، لەبەغداوە ئامادەكاریی بۆ دیداری پوتن‌و سودانی دەكەن لەسەر ئاسایش‌و تەکنەلۆژیاو چەند تەوەرێکی دیکە لەمۆسکۆ.

سێرگی شویگۆ سكرتێری ئەنجومەنی ئاسایشی ڕوسیا، لەبەغدا لەگەڵ هەریەك لەمحەمەد شیاع سودانی سەرۆك وەزیران‌و قاسم ئەعرەجی ڕاوێژكاری ئەنجومەنی ئاسایشی نیشمانی‌و مەحمود مەشهەدانی سەرۆكی پەرلەمان‌و لەتیف ڕەشید سەرۆك كۆماری عێراق كۆبوەوە.

ئەنجومەنی ئاسایشی نیشتمانی عێراق لەڕاگەیەندراوێکدا ئاشکرایکرد، "سەردانی شویگۆ بۆ بەغدا بەمەبەستی ئامادەكارییە بۆ دیداری چاوەڕوانكراوی نێوان محەمەد شیاع سودانی سەرۆك وەزیرانی عێراق‌و ڤلادیمیر پوتنی سەرۆكی ڕوسیا لەپەراوێزی لوتكەی عەرەبی- ڕوسی كە لەمۆسكۆ بەڕێوەدەچێت".

بەڵام لەپاڵ ئەم بابەتەدا، سكرتێری ئەنجومەنی ئاسایشی ڕوسیا لەبارەی چەند پرسێكەوە لەگەڵ بەرپرسانی عێراق گفتوگۆی كردوە، لەوانە (ئاڵوگۆڕی شارەزایی‌و زانیاریی، گواستنەوەی تەكنەلۆژیا، راهێنان لەبواری ئاسایشی سنورو ئاسایشی سایبێر، ڕوبەڕوبونەوەی تیرۆرو مادە هۆشبەرەكان).