کۆمسیۆنی هەڵبژاردنەکان دابەشکردنی زیاتر لە 2.2 ملیۆن کارتی بایۆمەتری تەواو دەکات

ئیرادە میدیا

کۆمسیۆنی باڵای سەربەخۆی هەڵبژاردنەکانی عێراق ئەمڕۆ پێنجشەممە ڕایگەیاند، لە چوارچێوەی ئامادەکارییەکانیان بۆ هەڵبژاردنی پەرلەمانی داهاتووی عێراق، پرۆسەی دابەشکردنی دوو ملیۆن و 250 هەزار کارتی بایۆمەتریی دەنگدەرانیان تەواو کردووە.

حەسەن هادی زایر، ئەندامی تیمی ڕاگەیاندنی کۆمسیۆن، بە ڕۆژنامەی سەباحی ڕاگەیاند: پرۆسەی بەڕێوەچوونی هەڵبژاردنی پەرلەمانی عێراق بە باشی و بەپێی پلانەکان بەڕێوەدەچێت.

ناوبراو ئاماژەی بەوەشدا: کۆمسیۆن نوێکردنەوەی لیستی دەنگدەران و ڕاهێنانی تیمی دەنگدەران و ئامادەکردنی ناوەندەکانی دەنگدان لە پارێزگا جیاوازەکاندا تەواوی کردووە.

بەپێی زانیارییەکانی ڕۆژنامەی فەرمی عێراقی، دابەشکردنی ئەم ژمارە زۆرەی کارتی بایۆمەترییەکە بەشێکی سەرەکی بووە لە ئامادەکارییەکانی کۆمسیۆن بۆ دەستەبەرکردنی پرۆسەیەکی دەنگدانی پاک و بێگەرد.

بڕیارە هەڵبژاردنی پەرلەمانی عێراق لە ڕۆژی 11ـی تشرینی دووەم (11/11) بەڕێوەبچێت، و کۆمسیۆن جەخت لەسەر ئامادەیی تەواوی خۆی دەکاتەوە بۆ سەرخستنی پرۆسەکە لە وادەی دیاریکراودا.